Перейти к разделу.
Грымӧбтісны лыйӧм шыяс
«Звезда» газетын уджалігӧн тулыснас волі командировкаӧн Пӧддельнӧйса лесопунктӧ (Пӧдтыбокӧ). Кык лун мысти пукси «Новосибирск» нима теплоходӧ, медым лэччыны Кӧрткерӧсӧдз. Вӧлі шондіа, гажа лун. Кадыс лун шӧр бӧр нин. Пассажиръяс пиысь унаӧн вӧліны палуба вылын. Меным син улӧ уси ӧти лабич вылысь места да пукси сэтчӧ. Теплоход ӧдйӧ кывтӧ визув ва ньылыд, син водзын вежласьӧны ойдӧм увтас инъяс, а кыр бокъясті мунігӧн теплоход гыясысь буждылӧ лыа берегыс. Ворсӧ шылад и мича тувсов серпасыскӧд ӧтув сетӧны мунысьяслы нимкодьлун, кыпыдлун.
Нёбдін пристаньысь кывтыштӧм бӧрын бара син водзын кутісны вежласьны тувсов серпасъяс. Ӧнӧп сиктӧ вотӧдз теплоход ныр увті вуджисны
ичӧтик пыжӧн кык зон. Найӧ тэрыба сынісны кык лопта пелысъясӧн. А недыр мысти виччысьтӧг грымӧбтісны лыйӧм шыяс, ӧти мужичӧй, коді вӧлі сулалӧ палуба шӧрас, кутчысис кынӧмас да кутіс ойзыны. Киыс вӧлі вирӧсь.
Бергӧді юрӧс да видзӧдлі ва вылӧ - пыжын пукалысьяс ружьеяссӧ веськӧдӧмаӧсь теплоход вылӧ. Ме пукалі мышкӧн да сӧмын слӧйми пинжак ворот - никӧс сувтӧдны - балябӧжӧс сайӧді. Теплоход друг ыджыд ӧдӧн веськӧдіс нырсӧ береглань, кытчӧ мый вынсьыс сынісны «кыйсьысьяс». Берегӧ ныръяссӧ теплоход да пыж сатшкисны ӧттшӧтш. Мыж вӧчысьяс, тыдалӧ, эз кужны думыштны, мый теплоход вӧтчас на бӧрся. Найӧ уськӧдчисны пышйыны кустъяс пӧвстӧ. Матросъяс да кодсюрӧ мунысьяс пӧвстысь уськӧдчисны пышйысьяс бӧрся. Ми палуба вылын майшасим: суасны оз? Недыр мысти лёк вӧчысьясӧс тодмышкалігтыр трап кузя катӧдісны теплоход вылӧ да домалісны гезъясӧн. Кор воим Кӧрткерӧс пристаньӧ, йӧз пӧвстын вӧліны и кык милиционер. Найӧ босьтісны преступникъясӧс.
Волі типографияӧ вӧчны клишеяс да петі кильчӧ вылӧ, а орчча нарсуд кильчӧ вылас сулаліс «Новосибирск» теплоход вылысь капитанлы отсасьысьыс. Ми кыдзи важ тӧдсаяс чолӧмасим, а сэсся юалі, мыйӧн судыс помасис? «Куим во кежлӧ дзескыдінӧ пуксьӧдісны», - вочавидзис сійӧ. Ва вывті ветлігӧн сэсся татшӧмторйыс эз нин вӧвлы.
Василий КАРПОВ.
Кӧрткерӧс.
Звезда. - 2010. - 30 марта
