Перейти к разделу.
Рöдня
Ворсысьяс: Миля да Наталь - 60 арӧса кымын нэмӧвӧйся нывъёртъяс;
Веня - Натальлӧн пи, 30 арӧса;
Рита - 6 арӧса.
Миля пукалӧ джоджын восьса шкап дорын да лыддьысьӧ. Пырӧ Наталь.
Наталь: Со, сідз и тӧді, мися, лыддьысьӧ. Абу тай дышыд.
Миля: Да бус чышкавны заводиті. Тайӧ шкапас важӧн нин эг пыравлы, восьті, а сэні нэмӧвӧйся «Кресьтянка», вот и ылалі.
Наталь (нерӧ): Кресьтянка. Ӧшиняд он эшты видзӧдлыны, а сусед Степанлӧн кӧзаыс капустатӧ вӧлі йирӧ.
Миля: Мед, кӧзаыслы сёйны жӧ колӧ.
Наталь: Петалам дзик пыр Степансӧ пинявны, ме сьвидетеляла, лок.
Миля: А Степансӧ мыйысь пинявнысӧ? Эз ӧд сійӧ капустасӧ йир.
Наталь: Мыйкӧ тэ талун тешкодь... Кучкӧм налим кодь жуниб... А мый тэкӧд, йӧйкӧд, сёрнитны. Кывзы, мый ме пыри. Буретш тӧдмалі, пенсияыд сӧмын 100 шайт вылӧ содӧ. А кӧсйысисны...
Миля: Но, не на абуыд, век нин водзӧ. Содтӧмыд абу чинтӧм. Тырмас.
Наталь: Тэ идрасигад юртӧ зутшкин али мый, он гӧгӧрво? Эсійӧ рыжӧй Чубайсыс битӧ бара донсьӧдас кыксё шайт вылӧ?!
Миля: Би вылад оз нин Чубайс камандуйт.
Наталь: Тэ мыйӧн тӧдан? Телеграмма тэд ыстыліс?
Миля: Газетысь нӧ лыдди.
Наталь: Мый тэ талун сэтшӧм шань? Кӧть енув пельӧсӧ пуксьӧд.
Миля: Пуксьы, ме тэныд ӧтитор лыддя (листалӧ кыз газет).
Наталь: Эн, эн бара-й, заразитан менӧ аслад йӧй лыддьысян висьӧмнад.
Миля: Да тэ кывзы, ме комиӧда. Со мый ыджыд пропессоръяс тӧдмалӧмаӧсь. Туялан кӧ пӧ аслад рӧдлысь, вужвойтырыдлысь, 8 кӧлена - тыдовтчас 265 гӧгӧр рӧдня морт. Гӧгӧрвоин? Коркӧ тӧвнас эштігӧн видлам?
Миля: Аминь. Дзонь арава!
Наталь: Энлы. А лыддьӧмаӧсь кодлыськӧ 300 миллион кӧлена да артмӧма, мый Му шар вылас став олысьыс рӧдня! Гӧгӧрвоин? Сідз и помалӧма со: «Все люди на Земле братья и сестры».
(Кост).
Наталь: Все?
Миля: Все! Сідзкӧ, и овны колӧ лӧня, ӧта-мӧдӧс пыдди пуктӧмӧн, жалитны да отсавны, мый верман, быд немабусьыс оз ков увгыны.
Наталь: О... но... э... (наяна) А Петыр Надежа либӧ тэныд рӧдня жӧ? Колӧкӧ, паныдасигад кутлыны кутан?
Миля (ышловзьӧ): Кутлыны, колӧкӧ, ог кутлы. А пинялӧмысь дугда. Ме ӧд сійӧс гӧгӧрвоа вӧлі. Менам Василеюшко, царство небеснӧй, сэтшӧм синмӧ шыбитчана мужик вӧлі, да нӧшта гудӧкасьны мастер. Эз ӧд сӧмын Надежалӧн сы вылӧ вежыс петлы.
(Кост).
Наталь: Сідзкӧ, став йӧзыс «братья и сестры»?
Миля: Все. Ставыс рӧдня!
Наталь: И... эсійӧ... мустӧм рыжӧй Чубайс меным рӧдня?!
Миля: Мый тэ Чубайс дорас сибалін? Со катыдса рыжӧй Валентин шырсьӧма да дзик Чубайс кодьыс лоӧма. А Валентинлӧн дедыс да тэнад батьыд воча вокъяс! (Дэльӧдӧмӧн шпыньялӧ).
Наталь: И... Америкаса Президент Барака миянлы рӧдня, ас морт?
Миля: Рӧдня. Некытчӧ он воштысь.
Наталь: И... и... и Путин миянлы рӧдня?
Миля: И Путин.
(Кост).
Наталь: Пета. Письмӧ гижа. Путинлы. Мед пенсияӧс оз 100, а 200 шайт вылӧ содтас. Рӧдня морт. (Петӧ, еэсся бара юрсӧ мыччылӧ да наяна) А рӧдня Степаныдлӧн кӧзаыс бара нин капуста дорад каньзьӧдӧ!
Мӧд юкӧн.
Улича вылын Натальӧс паныдалӧ Ритук.
Ритук: Наталь тьӧт, тэнад керкаад кутшӧмкӧ дядьӧ пырис.
Наталь: Дядьӧ пырис? Ме тасавлі да?
Ритук: Да, тассӧ шыбитіс да и пырис.
Наталь: Тас шыбитіс? Но-ко, видзӧдлам, кутшӧм рӧдня тас сайӧ лысьтӧ пырны (босьтӧ бедь).
Натальлӧн керка, крӧвать вылын мышкӧн куйлӧ мужичӧй. Наталь пырӧ, киас бедь, мӧдас гез гартыштӧма, надзӧник матыстчӧ, ырыштчӧ.
Наталь: Веня?! Веня... (вӧрзьӧдӧ, мужичӧй звирк чеччӧ крӧвать вылысь. Наталь лигышмунӧмӧн пуксьӧ воча). Веня... Кӧні нӧ мича чужӧмыд, пиукӧй?!
Веня: О, мам... Но мый тэ... мича чужӧм... шуан жӧ. Век на важыс... ме... чолӧм, мам (кутлӧ).
Наталь: Тэ мый татшӧм тешкодь... оборванеч кодь паськӧма... а... (повзьӧ) тэнӧ удж вывсьыд вӧтлісны? Тэ абу нин милицонер?
Веня: Мыйла вӧтлісны? Ачым муні. Мам, юр потӧ туй вывсянь, автобусыс дука вӧлі да сійӧн ли, мый ли... Узьышта, рытнас сёрнитам (бара водӧ).
Наталь: (таркнитӧ, чеччӧдӧ) Но-ко, пиӧ, висьтав, мый тэкӧд лои, висьтав мамыслы.
Веня: Мам, тэнад зырасян важӧн вӧлі, абу? Грамм 20, юр висьӧ, збыль. Абу ме код... муртса гажа. Но оз ков, оз ков. Узьышта и «в норме» лоа (бӧр водӧ).
Наталь: А но-ко! (Швачкӧ гезйӧн). Чеччы! Зэв ӧдйӧ пывсянӧ марш! Васӧ пыртлӧма нин, пескыс кӧджас! Ломты, мыссьы, вӧлисти гортад пыр! Видзӧдтӧ, локтӧма, менам выль покрывалӧ вылӧ водӧма туй выв паськӧмӧн! Дзизом! 20 грамм ме тэд петкӧдла! (Веня тракнитӧ гезсӧ, петӧ). Ок! (Лигышмунӧ). Ойя да ойя... Вот шогыд тай лои... удж вывсьыс вӧтлӧмаӧсь, дерт, колӧкӧ... кор нин... тшӧтьыс тай эм нин-а... Мый кутас тані вӧчны, сиктас ӧд уджыс абу... весиг колхозӧ нин блатӧн сӧмын примитӧны... А ме, паськыд вом, войдӧрлун лавкаын кодкӧ юаліс да, мися, милиционерӧн карын уджалӧ. Шмониті на, колӧкӧ, мися, генералӧдз воас... (Юрас кутчысьӧмӧн катласьӧ). Ой, аминь... а гезсӧ мыйла кватитіс... О, Господьӧ, аскӧдыс кӧ мыйкӧ вӧчас! Мый ме вӧчи! (Котӧрӧн петӧ). Веня!!! (Регыд мысти пырӧны). Вод, шойччы, пиӧ... Эн кывзы менӧ, пӧрысь выжывӧс... мый оз овлы олӧмад да... Вод. (Водтӧдӧ, шебрӧдӧ). Пывсян ваймас, садьмӧда. Улыс паськӧмыд на эм кӧнкӧ, сӧстӧм дӧрӧм на сюрас и. (Тапкӧдӧ). Шойччы... Сёрнитам, небось, рытнас, бурӧн. Чубайскӧд на миритчим, а тэкӧд огӧ на лёкалӧй... Ставыс бур лоӧ... Нинӧмӧ огӧ на усьӧй...
Пом.
Звезда. – 2010. – 9 февраля
