Перейти к разделу.
ЗАГСЫН
(Öти юкöна шмонь)
Ворсысьяс:
Загсын уджалысь.
Том верöс.
Том гöтыр.
Наталья - зонлöн мам.
Мария - нывлöн мам.
Пызан сайын пукалö загсса уджалысь. Пырöны том гозъя.
ЗАГССА УДЖАЛЫСЬ. Пырöй, пуксьöй воча. Ме кута юасьны, а тi вочавидзны. (Том зонлы) Кыдзи тiян овыд?
ВЕРÖС. Попов Владимир Иванович.
ЗАГССА УДЖАЛЫСЬ. Кымын арöс?
ВЕРÖС. Дас öкмыс.
ЗАГССА УДЖАЛЫСЬ (том нывлы). Тiян овыд?
ГÖТЫР. Нывдырсясö али öнiясö?
ЗАГССА УДЖАЛЫСЬ. Менö интересуйтö öнiяыс.
ГÖТЫР. Попова Нина Васильевна.
ЗАГССА УДЖАЛЫСЬ. Кымын арöс?
ГÖТЫР. Дас öкмыс.
ЗАГССА УДЖАЛЫСЬ. Кор тi гöтрасид?
ВЕРÖС. Куим тöлысь сайын.
ЗАГССА УДЖАЛЫСЬ. Куим тöлысь и тырмöма тiян сöгласыд. А дыр-ö вöлiд тöдсаöсь водзын, дыр-ö гуляйтiд гöтрасьтöдзныд?
ВЕРÖС. Ми öти сиктысь, но гуляйтiм куим тöлысь.
ГÖТЫР. Эн ылöдлы, унджык.
ВЕРÖС. Мый ме тэнö йöктыны корлывлi, сiйöс шуан гуляйтöмöн? Ме сэки тэнö весиг эг на колльöдлывлы.
ЗАГССА УДЖАЛЫСЬ. Ладнö! Сiдзкö куим тöлысь гуляйтiд и шуид гöтрась-ны. Тадз?
ВЕРÖС. Да.
ЗАГССА УДЖАЛЫСЬ. Тэ радейтан гöтыртö?
ВЕРÖС. Радейтлi, öнi ог.
ЗАГССА УДЖАЛЫСЬ (том нывлы). Атэ радейтан мужиктö?
ГÖТЫР. Радейта.
ЗАГССА УДЖАЛЫСЬ. Радейтан, а шыöдчöмсö тай кырымалöмыд. Кодi нö медводз гарыштiс торйöдчöм йылысь?
ВЕРÖС. Нина первойсö эз кöсйысь, а сэсся кырымалiс.
ЗАГССА УДЖАЛЫСЬ. Мыйла торйöдчад? Гöтрасигад öд, кöнкö, радейтiд мöда-мöдтö.
ВЕРÖС. Да, радейтiм.
ЗАГССА УДЖАЛЫСЬ. А мыйла дугдiд радейтны?
ВЕРÖС. Миян характерным абу öткодь вöлöма. Сiйöн радейтчöмыс и быри.
ГÖТЫР. Абу сiдз. Миян характерным öткодь да сiйöн и оз артмы олöмыс.
ЗАГССА УДЖАЛЫСЬ. Кыдзи тайöс гöгöрвоны, мый характерныд öткодь да он вермöй овны?
ГÖТЫР. Сiйö заводитас пинясьны, ме тшöтш. Сiйö тышкасьны пондас, и ме
ог сетчы, парсася. Сiйö босьтчас менö мыйöнкö лыйлыны, и ме - сiдз жö. Öт-чыд лыйис менö тасьтiöн, а ме сылы юр вылас кисьтi шыд миска. Сiдзкö, миян öткодь характерным.
ЗАГССА УДЖАЛЫСЬ. Сiдз, нöшта кутшöм помка эм?
ВЕРÖС. Менсьым носки ни дöрöм-гач оз песлав. Кута пö тай тэнсьыд трусикъ-ястö ниртны.
ЗАГССА УДЖАЛЫСЬ. А кодi песлалö, ачыд али мый?
ВЕРÖС. Кор ачым, а кор и талöн мамыс.
ЗАГССА УДЖАЛЫСЬ. А кодi сёянтö пуö?
ВЕРÖС. Кор ме, кор мамыс.
ЗАГССА УДЖАЛЫСЬ. А и öтлаын мамыскöд олад?
ВЕРÖС. Торйöн, но öти вев улын, торъя пыранiнöн.
ЗАГССА УДЖАЛЫСЬ. Сiдзкö торйöн.
ВЕРÖС. Да.
ЗАГССА УДЖАЛЫСЬ. А тэ, гöтыр, мый та вылö шуан?
ГÖТЫР. Абу ставыс сiдз. Сiйö локтас удж вылысь да пуксяс телевизор дорö либö газет лыддьö. А ме кута сылы песласьны да пусьыны? Ме тшöтш уджала.
ЗАГССА УДЖАЛЫСЬ. Гашкö, нöшта кутшöмкö помка эм?
ВЕРÖС. Ме ог куритчы, а гöтыр куритчö. Унаысь кöсйысьлiс шыбитны, но эз дугды, а ме войнас ог вермы терпитны табак дуксö, быттьö восöдны кöсйö.
ЗАГССА УДЖАЛЫСЬ. А свидетельясыд эмöсь?
ГÖТЫР. Кодi вöлi гижсигад, найö абуöсь, сöмын мамъяс.
ЗАГССА УДЖАЛЫСЬ. Чукöстöй найöс.
Пырöны кык нывбаба.
НАТАЛЬЯ. (пыригмозыс матыстчö пызан дорö да шуö гораа). Ради бога, торйöдöй тайöясöс, а то пöгибнитас менам коньöр пиöй. Со дзикöдз нин кутiс косьмыны. Этая ёма-баба эня-ныла пондаыс.
МАРЬЯ. (гораа жö). Ёма-баба пö, а тэ бара мый... Еретнича, тэ тшыкöдiн найöясöс, мед торйöдчасны. Тэ вöлi он тшöкты питö гöтрасьны Нина вылö, сы понда и тшыкöдiн.
ЗАГССА УДЖАЛЫСЬ. Эн увгöй вай, танi абу базар. Петöй да ывлаын зык-сьöй.
НАТАЛЬЯ. Кутшöм тэ ачыд дыш, сэтшöм и нылыд тэнад. Да, ме эг тшöкты гöтрасьны тайö дженьыд бöжа вылас, да эз тай кывзысь, вот öнi и страдайте.
ВЕРÖС. Мамö, тырмас, ланьт, тэнад шумитöмыд танi оз отсав.
МАРЬЯ. Тэ тшыкöдiн, тшыкöдiн менсьым Нинаöс. Тэ вöлi синнад он аддзы сiйöс, а пиыд гöтрасис.
ЗАГССА УДЖАЛЫСЬ. Тадзи ме тiянкöд сёрнитны ог вермы, ковмас петны. (Петö).
НАТАЛЬЯ. Некод тiянöс эз тшыкöд, а тiян рöдыд сэтшöм. Тэнад совхозад уджалiгад, небось, кепысьыд эз киссьыв, вöв эн доддявлы, эн ытшкыв, сöмын вöлi корсян, кöнi кокниджык.
МАРЬЯ. Омöля кö уджавлi, эз эськö премируйтлыны менö платтьö дöраöн.
НАТАЛЬЯ. Премируйтлiсны, дерт, кор тэнад вокыд вöлi управляющöйöн. Не вокыд кö, тэд премиятö не аддзывны, то... (Петкöдлö пигасö).
Пырö загсса уджалысь.
ЗАГССА УДЖАЛЫСЬ. Вай петöй, петöй... (Йöткалö кыкнансö. Бабаяс пе-тöны, но öдзöс саяс век на кылö зыксьöмыс).
Но вот, неуна лои гöгöрвоана. Мыжаöсь кыкнанныд. А тэд, том мортлы, шуа: гöтрасин кö, колö гöтырыдлы отсасьны, сiйö öд тшöтш уджалö. А тэныд, том гöтырлы, со мый висьтала: петiн кö верöс сайö, ковмас тэд и песласьны, и пусьыны да нöшта унатор на вöчны. Та йылысь колö верöс саяд мунтöдз ду-майтны. А кага лоас да, кодi кутас дöзьöритны, верöсыд? Олiгад быдтор лоö вöчны. Верöслы - мужичöй удж, а гöтырлы - ассьыс удж. Дерт, мöда-мöдыдлы ёна ковмас отсасьны, сытöг семья олöмыд оз ладмы. Ме тiянöс торйöдны ог вермы, да и менам сэтшöм правоыс абу. Сета тöлысь бурасьны. Он кö ми-ритчöй, суд торйöдас.
ВЕРÖС. Тöлысь на ковмас терпитны тайöяслысь шумитöмсö. Кöть ме ола нин мам дiнын, кор мунöны öшинь увтi, понъяс моз век увтчöны.
ГÖТЫР. Володя, вай бурасям.
ВЕРÖС. Ог и ог, тэ кымынысь нин кöсйысьлiн öвсьыны, а мод лунас важсьыс ёнджыка быд ногыс кутан пинявны менö да мамöс. Тырмас, терпенньöысь петi, бурджык, муна кö кытчöкö.
ЗАГСА УДЖАЛЫСЬ. Тырмас, та вылын помалам. Век жö кора бурасьны.
Петöны.
ЗАНАВЕС
Звезда. – 2004. – 3 февраля
