Перейти к разделу.
Кино Вась да ас сиктсаяс
«Коми йӧзӧдчан керка» лэдзис Василий Поповлысь ас (Кино Васьлысь) «Ме да сиктсаяс» небӧг, кытчӧ пыртӧма серамбана неыджыд висьтъяс
Василий Вячеславович Попов чужис 1949 вося май дасӧд лунӧ Кӧрткерӧс районса Ыджыдвидз сиктын. И пӧшти нэмсӧ олӧ-вылӧ, ворсӧ-сьылӧ тані. Он кӧ быттьӧ лыддьы Ленинградӧ киномеханикӧ велӧдчыны ветлӧмсӧ, код бӧрын уна-уна во петкӧдліс сиктса войтырлы кино. Та вӧсна и Василий Поповӧс быдлаын тӧдӧны, кыдзи Кино Васьӧс.
Нӧшта кык во армияын служитіс, а сэсся во-мӧд уджаліс Сыктывкарса вӧр заводын. Зимогӧритыштӧм бӧрын бергӧдчис чужан сиктас да сэсся некытчӧ нин эз ветлы татысь. Лоис ас сиктсаӧс гудӧкӧн ворсӧмӧн гажӧдысьӧн, налы серам петкӧдлысьӧн. Сэтшӧм войтыр- тӧгыд сиктъясад вӧлі эськӧ, ок, гажтӧм.
Шмонлив мортыд нэмсӧ чу-
кӧртӧма аскӧдыс да Ыджыдвидзса олысьяскӧд серамбана лоӧмторъяс. Сэсся ӧтчыд, во дас сайын кымын, ыстӧма та йылысь неыджыд висьтъяссӧ «Чушканзі» журналӧ. Та бӧрын ӧнӧдз на ёртасьӧ сыкӧд. Дзик быд номерын петавлӧны «Кино Васьлӧн лӧсасъясыс». Сылысь висьтъяссӧ окотапырысь йӧзӧдлӧны «Коми му» газетын. Найӧс тӧдӧны телевизор видзӧдысьяс, радио кывзысьяс да «Войвыв кодзув» журнал лыддьысьяс. Воис кад лэдзны и торъя небӧгӧн.
Серамбана висьтъяссӧ гижӧма озыр коми кыв вылӧ мыджсьӧмӧн. Сэтшӧм вылӧ, код вылын сёрнитӧны сиктса войтыр. Эскам, гижӧдъясыс лоасны бур козинӧн налы, кодъяслы сьӧлӧм вылас воӧ шмонь, ёсь кывъя йӧзлӧн висьталӧм. Шмонь-
тӧг олӧмыд пӧ дуб сёян панялӧм кодь.
Небӧг петӧмсӧ «Коми йӧзӧдчан керкаын» уджалысьяс шуисны пасйыны некымынлаын. Июль 2 лунӧ выль петассӧ нимӧдам Кӧрткерӧсса коми культура шӧринын дас ӧти часын, июль 4 лунӧ — Одыбын 12 часын, Висерын луннас 3 часын да Ыджыдвиддзын рытъявылыс квайт часын. Сиктса библиотекаясын тайӧ аддзысьлӧмъяс дырйиыс позяс ньӧбны выль небӧгсӧ гижысьыслӧн кырымпасӧн.
Сиктса войтыркӧд паныдасьны воласны «Коми йӧзӧдчан керкаса» уджалысьяс. Сборникса редактор Алексей Попов висьталас небӧг вылын удж йылысь. Выль петасысь ӧприч лоӧ вайӧма «Коми йӧзӧдчан керкаӧн» лэдзӧм мукӧд небӧг.
Алексей Поповлысь книгаяссӧ тшӧтш жӧ позяс ньӧбны сылӧн кырымпасӧн. Коми литература радейтысьяслы лоӧ вӧзйӧма Николай Щукинлысь, Виктор Савинлысь, челядьлы да мукӧд небӧг, а сідзжӧ ичӧт классъясын велӧдчысьяслы рабочӧй тетрадь, кодӧс лэдзліс «Би кинь» журнал.
Алексей МАКАРОВ.
Коми му. – 2014. – 26 июня. С. 23
