Перейти к разделу.
Тшайник
Тит Вань Ӧльӧш ымзіс-бергаліс вольпасяс, мыйкӧ гӧгӧрвотӧма горӧдлывліс, чужйыштчывліс киссьӧм подъя носкияса кокъяснас. Сэсся друг черӧбмуніс да восьтіс былялӧм-гырдмӧм синъяссӧ.
Нинӧм гӧгӧрвотӧма видзӧдліс гӧгӧрбок да сьӧкыда пуксис крӧвать вылас. Лэдзис позялӧм кокъяссӧ джоджас, лэдзчысис гырддзаяснас пидзӧсъяс вылас да дзӧрысь кияснас пыкис сьӧкыд юрсӧ. Ыджыда ышловзис да шуис аслыс моз:
- Ы-ы-ых, - топӧдыштліс да зыралыштіс порсь тшӧть кодь чепӧсйӧм чорыд тошка чужӧмсӧ, - вӧтавсяс жӧ быд страстьсӧ. Б-р-р.
А вӧталіс сійӧ збыль зэв страшнӧйтор. Быттьӧ кузь сюра, кӧза кодь тошка, ӧгралысь синъяса мути кватитіс сійӧс юрсиӧдыс, чеччыштіс-пуксис пельпомъяс вылас, топӧдіс сьылі гӧгӧрыс чорыд, гӧна кокъяссӧ да плеть кодь бӧжнас вачкалігтыр вӧлӧс моз кутіс гӧньлӧдлыны вильски-вальски няйт туй вывті. Усьӧ-чеччӧ, рӧдтӧ Ӧльӧш, а мути-дявӧлыд руксӧ нимкодя, чиктылӧ сьылі вылас. Кузь, чорыд бӧжнас плетьӧн моз сӧмын и швучйӧдлӧ-нӧйтӧ коньӧрӧс. Сэсся друг быттьӧ мутиыдлӧн киас вина сулея лои. Кисьтас гранъя стӧканӧ да сӧмын швич юас. Бӧж помнас ветьӧкӧн моз чышкыштас лёк ногӧн чурвидзысь клыкъяса мисьтӧм вомсӧ да “Прима” куритчан пачкаӧн закуситӧ - дзоньнас вомас сюяс да аклялӧ. Пеж вомсьыс виж быг лэччӧ.
Ӧльӧшлы быттьӧ окота жӧ эськӧ юыштны, да оз лысьт корнысӧ. Мутиыд быттьӧ сэсся и кисьтіс жӧ Ӧльӧшлы.
Стӧкан тырыс. Ӧльӧш кватитіс кыкнан кинас да кутіс горша юны.
Юис да юис, юис да юис, некыдз оз вермы помавны винасӧ стӧкансьыс. А аслыс нимкодь быттьӧ, винаыс уна да. Сэсся быттьӧ мисьтӧм чужӧма мутиыд кыдз тай усь- кӧдчас-шашаритчас кузь гыжъяса лапа-кияснас голяас да руксігтырйи кутас джагӧдны морттӧ. Страсьт. Ымзӧ-мездысьӧ Ӧльӧш, пессьӧ-мырсьӧ коньӧр. Жуявны кутіс. Тайкӧ и пӧдас-джагалас... Слабог, садьмис.
Ойӧстіс, ружӧктыштіс да сувтіс кок йылас. Шатласигтыр довгис ва пельсалань. Кок улас кылӧ гольмуніны-пӧрины куш сулеяяс. Босьтіс кӧш да тырыс гумовтіс ва пельсаысь жуньышмӧм нин васӧ. Горша юис. Сэсся нӧшта на кӧш джын содтіс. Видзӧдліс джоджын паллялысь “Троя” сулеяяс вылӧ да весиг йирмӧг котӧртіс мышку кузяыс. Плеш вылас чепӧсйис кӧдзыд пӧсь: “Сы мындасӧ нӧ кыкнас, Ликӧ Васьыскӧд, кыдзи юсьӧма? Али нӧ кодкӧ нӧшта пыраліс? Б-р-р... Ог помнит, лешак машинаыд".
Чужьялігтыр, зывӧкпырысь вешталіс-чукӧртіс пач водз дорланьӧ квайт куш “Троя” доз. Матыстчис пызан дорӧ да кытшовтіс синнас: кык сарӧгӧссьӧм кружка, куш кильки банка, чорзьӧм сьӧд нянь корка да няйт, чигарка помъясӧн тырӧм жӧсть банка кындзи, нинӧм абу. Ӧльӧш сьӧкыда пуксис улӧс вылӧ да ымӧстіс:
- Ой-ё-ёй-й, ог вермы-ы-ы, у-уф-ф... Сэсся кӧ коркӧ юа тайӧ страм “Троясӧ”. Некор ог ю сэсся ... Кӧртала! Шабаш!
Пукыштіс. Сэсся босьтіс ӧти кружкасӧ да матыстіс ныр дорас, исыштіс. Кезнитӧдіс лёкысь: “фу-у, пежтор", - шуыштіс да мыйлакӧ вом дорас бӧр матыстіс. Чаль мында кольыштӧм дука сорассӧ кисьтіс тӧчила кодь пыктӧм кыв вылас да тяпкӧдыштіс вомсӧ. Друг мыйкӧ муткыртчис кынӧмас. Шогӧдіс Ӧльӧшӧс, гудыртчис сьӧлӧмыс. Уксігтьірйи котӧртіс таз дорӧ да синва петмӧныс ойзіс-восіс. Сэсся содз тырнас мыссян чуманысь койыштіс кӧдзыд васӧ пыкталӧм чужӧмас, чышкыштіс воймӧм нин ки чышкӧдӧн да бӧр довгис пызан дорас. Синнас корсис куритчан пачка. Абу. Гӧгӧр куш. Лукйысьыштіс папирос помъяс тыра банкаын да перйис сэтысь вит-ӧ- квайт кузьджык чигарка пом. Косяліс стенын ӧшалысь календарысь ӧти лист да гартыштіс кызіник “кӧза кок”. Биаліс да горша кыскыштіс. Виньдіс дука тшыннас да бура дыр тшӧкъяліс. Сэсся тай шедіс жӧ лолыс. Азыма кутіс шпуткыны-куритны ӧшиньӧ дзоръялігтыр...
Мир туй кузя туй дор керка ӧшиньясӧ видзӧдалігмоз шлёпсьӧдӧ-мунӧ абача кодь ён айлов. Сувтыштлас, мӧвпалыштас мыйкӧ ас кежас да водзӧ бротиктӧ. Шапкатӧм со.
- Чӧвлы, да тайӧ жӧ Ликӧ Вась, - ыльӧбтіс-чеч- чис Ӧльӧш да матыстчис ӧшинь дорас. Курич пӧлӧн мӧдіс вишкыны-кыйӧдны ӧтлаын юысь ёртсӧ, кодарӧ сійӧ сетчас. А Ликӧ Вась кежис Сава Ӧгашъясӧ. Ӧльӧш веськодя ышловзис да бӧр шлапкысис-пуксис улӧс вылӧ.
- А-а! Сава Ӧгашыдлысь тӧвнас лымсӧ он босьт, непӧштӧ сулея, - шуыштіс аслыс да ӧвтыштіс кинас ёртсӧ жалитыштӧмӧн.
Недыр мысти тыдовтчис Ликӧ Вась. Ӧльӧш донъялана видзӧдліс сылӧн нёпмунӧм зепъяс вылӧ да зумыша чӧвтіс:
- Ме тай шулі, мися, Сава Ӧгашад оз пузьы нинӧм.
Ликӧ Вась кежис Тит Вань Ӧльӧш ёртыс дорӧ. Коксӧ пыркӧдыштіс чирссьӧм гӧликӧн да чина морт моз котш-котш вӧчис, тотшкӧдчис ӧдзӧсӧ.
- Позьӧ? - Ликӧ Вась мыччис ӧдзӧсӧд пач лыс кодь лёзь гӧрд юрсӧ.
- Пыр, пыр. Мый сэні котшкӧдчан, он ӧд директор дорӧ пыр. Немуйтан сэні.
- Мый нӧ бубуля кодь пукалан, вӧльнӧй свет вылас он петав?
- А мый сэсь корсян? Коді менӧ виччысьӧ?
- Висьӧ юрыд?
- Ой, эн нин шу нинӧм. Чашкӧдӧ прамӧ. Тӧрыт ӧмӧй кыкӧн гындім-юим квайт “Троя” сулеясӧ? Али нӧ кодкӧ пайкысь вӧлі жӧ?
- Он помнит али мый?
- Нинӧм ог. Сё ей богу.
- Вот это да, - рочыштіс Ликӧ Вась. - Матрен Миш пыраліс. Тэ стӧкан тыр кисьтін сылы. Сійӧ юис да кутіс бызгыны нинӧм абусӧ. Сэсся тэ сылы ныр-вомас и вуштыштін кульӧм меж юрнад”.
- Дугды, эн вай сӧр. Мыйысь нӧ ме кута нӧйтны Матрен Мишсӧ?
- Эн на шу. Дӧмыштін тай... Сійӧ ӧд тэнӧ уд- тысьӧн нимтіс.
Удгысьйн? Мый нӧ ме удгі? Кодӧс кодлы?
- Сійӧ ӧд и эм.
- А мый нӧ пӧ удті? Висьталіс жӧ?
- Быттьӧ пӧ тэ удтӧмыд сійӧс директорлы, мый гусялӧма скӧт картаысь ӧтруб мешӧк да вузалӧма сійӧс сулея вылӧ Сава Ӧгашлы.
- Вот гадыд! Ме удті?
- Тэ пӧ... Вот сэсся тэ и ӧзйин. Кыдз тай лӧсыштін ныр-вомас - гырдсермуні. Нюжӧдчис джоджӧ краж моз. Тэ эськӧ чужъявны на заводитлін, да ме куті. Эг лэдз, виян, мися. Тайкӧ и менӧ сэсся тшӧтш пачесайтан.
- А Матрен Мишыс?
- Сійӧ чеччис да сьӧласиг-матькигтыр усйы- сис-муніс. Грӧзитчис на, сюрлан пӧ мӧдысь, водзӧс босьта.
- Ёна ме сыысь пола да.
Пукалыштісны чӧв. Ликӧ Вась гӧгӧртіс синъяснас Ӧльӧш другыслысь керка пытшкӧссӧ. Сэсся друг сылӧн синъясыс ӧзйисны.
- Ӧльӧш, кӧсъян, ӧні жӧ, вит минут мысти, еджыд сарапана доз вая?
- Эн сӧр. Дыш кывзынысӧ.
- Збыль шуа.
- Мун сэсь. Ме бурджык куйлышта, ато сьӧлӧмӧй муткырасьӧ да-й юрӧй потӧ тайӧ страм “Троясьыд”.
- Но, но. Куйлышт. Пӧж пӧкмеллятӧ.
Ӧльӧш нюжӧдчис крӧватьӧ, кунис синъяссӧ.
Ликӧ Вась чеччис, мыйкӧ мошкоритчыштіс да воськовтіс ӧдзӧслань.
- Но, ме муні. Видзӧдлан вот, ог кӧ вай дозтӧ.
Тит Вань Ӧльӧш весиг эз шыась, сӧмын скӧрысь ружӧктыштіс.
Недыр мысти кыліс кок шы да воссис ӧдзӧс. Паськыда шпыньяліг-вашъялігтыр пырис Ликӧ Вась. Ылӧдз чургӧдӧм киас дзирдаліс-красуйт- чис югыд вина сулея. Да эз кутшӧмкӧ "бурда”, а “Распутин” водка!
- Кытысь нӧ, кӧч сіталіс али мый? - звирк чеччис Ӧльӧш да уськӧдчис паныд.
- Места надо знать, - рочыштіс Ликӧ Вась да мыччис дозсӧ ёртыслы.
Ӧльӧш кватитіс да быдӧн окаліс югыд дозсӧ, веськыда этикеткаас серпасалӧм айловыслы ускас. Сэсся пуктіс дозсӧ пызан шӧрас да уськӧдчис корсьны мыйкӧ вомӧ сюянтор. Вайис кык лук, сов доз да нянь кӧрыш. Ликӧ Вась пуксис пызан сайӧ да нюмъялігтыр босьтчис песовтны юрсӧ “Распутинлысь’’.
- Пуксьы нин вай, мый сэн жӧдзан?
- Энлы, тшай пузьӧдам да вӧлись.
Пӧсь тшайнас, заваритам бура да, шпунтовка вӧчам. Сідзсӧ дырджык тырмас,
- сьылыштіс Ӧльӧш да кутіс клёнӧд- чыны-корсьысьны.
- Кытчӧ нӧ пуктыссьӧма, бога мать, некӧн абу. Тэ эн жӧ аддзыв?
- Мый эг аддзыв?
- Да тшайниксӧ но... Сылӧма быттьӧ.
А Ликӧ Вась шпыннялӧ-пукалӧ.
Кружкаяс нин матыстӧма, лӧсьӧдчӧ кисьтавны водкасӧ.
- Мый шпыннялан-жеръялан сэні?
Кӧн тшайникыс, он жӧ тӧд?
- А этійӧ нӧ мый? - сольк-сольк вӧчис дознас Вась.
- М-мый? - тшӧкмуніс Ӧльӧш. - Да тэ мый? Менсьым тшайниксӧ вузалін али мый?
- А тэ чайтін, меным прӧста сідзи сюри тайӧ сарапана дозйыс?
- Ныра сволочӧс! Падла! Ӧні жӧ бӧр ну, б... Кыдз гажыд, а тшайниксӧ бӧр вай!
- Мен ӧд мый? - чеччис Ликӧ Вась да бӧр гартыштіс разьлӧм пробкасӧ сулеяӧ.
- Ме ӧд тэнӧ жӧ, йӧйӧс, жалиті да сійӧн... Мися, кулан... Но, сідзкӧнӧ.
Ликӧ Вась лӧсьӧдчис петны. Дозсӧ бергӧдлыштіс киас, сьӧкыда ышловзис да сюйис питшӧгас.
Ӧльӧшлӧн друг кыдзкӧ вом тырыс дуль ваыс локтіс. Гутш ньылыштіс да кутчысис юрас. А юрыс Ӧльӧшлӧн збыльысь зэв ёна висис. Быттьӧ гын нӧшкӧн вачкӧмаӧсь и пытшкӧсас сімӧм сутугаӧн гирскӧны. Бугдзыльтліс плеш пырыс ӧдзӧсӧд петысь Вась вылӧ да друг уськӧдчис сы бӧрся. Вась быдӧн повзис. Клоп пӧдлаліс ӧдзӧссӧ да котӧрӧн петіс кильчӧ вылас.
- Да сулавлы, рыжӧй чӧрт! Вай дозсӧ! Матеро, тшайникнас и ставнас. Менам кольтан-кипятиль- ник эм. Бакалын зэв жӧ лӧсьыда пузьӧдас тшайтӧ.
- Вот это по-нашему, - шешмуніс Ликӧ Вась да бӧр пырис другыс бӧрся керкаӧ.
- Кисьтав зільджыка, шматьӧй...
Ликӧ Вась кисьталіс биа васӧ кружкаясӧ да босьтіс ӧтисӧ киас.
- Но, пожъялам тшайниктӧ.
- А-а, - ӧвтыштіс кинас Ӧльӧш, - ӧтар бокыс лямалыштӧма жӧ нин вӧлі. Матеро...
Кык друг чокнитчисны да чӧскыда гулькни- тісны-юисны кушӧдз.
- А-ак! Добра! - малыштіс кынӧмсӧ Ликӧ Вась.
- Добра и эм, - содтіс Ӧльӧш да шӧриаліс- чегис нянь кӧрышсӧ. - На, закусит, другӧ. Со луксӧ тшӧтш курччы, сӧлас тшукӧдлы да.
Нямлясьыштны. Пукалыштісны чӧв. Кыкнанныс кывзыштісны морӧс пытшканыс вина жа- рыслысь ӧгрӧдлӧм-ворсӧдчӧмсӧ. Первой синъясныс югзисны. Сэсся вирсялыштны бандзибъ- ясныс. Быттьӧ весиг томмыштісны.
- Но, вай, другӧ, тшынасьыштам, - Ликӧ Вась перйис “Прима” пачка.
- Тэ тай зэв озыр, - меліа нюммуніс Ӧльӧш да пестіс чигаркасӧ. Чӧскыда кыскыштіс. - Вот тайӧ Друг!
- Друг, дерт, - пушнитіс тшынӧн Ликӧ Вась. Сэсся гач зепсьыс перйис кык “Троя” сулея. Клон пуктіс пызан вылӧ. - Со на нӧшта мый эм!
- Тэ волшебник али мый? - чуймис Ӧльӧш, - кысь нин тайӧ лои?
- Мый нӧ ме ӧти доз вылӧ али мый сеті Сава Ӧгашлы тшайниктӧ? Абу ӧд йӧй. Зэв эськӧ скупердяй сійӧ да. Но ме абу жӧ, кыдз шуласны, "лыком шит”.
...Бура дыр пукалісны-трайгисны кык друг. Кушӧдз ректісны и “Распутинтӧ”, и “Трояястӧ”. Кыкнанныс мыйкӧ бызгисны-висьталісны, но некоднанныс эз кывзыны.
Вой шӧр гӧгӧр Ӧльӧш лэптіс юрсӧ пызан вылысь да гӧгӧртіс былялӧм синъяснас керка пытшсӧ. Сэсся чӧвтіс синъяссӧ другыслӧн пукаланінӧ да весьӧпӧрліс, быттьӧ кӧдзыд пӧсьӧн койыштісны мышку кузяыс. Гырысь ва больяс ӧшйисны плешкас. Ликӧ Вась другыс местаын ыджыд “Троя” сулея сайсянь шпынняліс-ви- дзӧдіс сы вылӧ да читкыраліс син пӧвсӧ сюра- тошка Распутин.
Одыб сикт.
Геннадий Попов
Звезда 30 мая 2000 года
