Перейти к разделу.
Пӧсь сьӧлӧма ань
Ыджыдвиддзын матӧ 50 во олӧ-вылӧ зэв аслыспӧлӧс, интереснӧй морт. Тайӧ Нина Васильевна Симпелева, нывдырся овыс - Заглубоцкая. Сиктса зон Ӧньӧ Миш, Михаил Андреевич, армияын служитӧм бӧрын вайӧдіс роч нылӧс чужан сиктас, гӧтрасис.
Нина Васильевна заводитіс уджавны школаын и сетіс сылы 30 во: вӧвлі пионервожатӧйӧн, библиотекарӧн, велӧдліс труд, роч кыв да литература, уджавліс воспитательӧн школаса интернатын.
Бура помнита труд урок: вышивайтлім детсадлы салфеткаяс да ки чышкӧдъяс вылӧ дзоридзьяс, шепъяс, кыдз коръяс. Эз на пыр артмыв. Нина Васильевна матыстчыліс да петкӧдліс, кыдзи колӧ гладьӧн вышивайтчыны... Ачыс сійӧ зэв киподтуя, ӧні кыӧ сэтшӧм мича вӧччан шальяс, мый вежыд петас! Да и пӧжасьӧ - вомад сылӧ!
1960 воясӧ школаса библиотекаын вӧлі кык шкап, йиркӧдзыс небӧгъяс. Уна коми книга сэк вӧлі челядьлы лыддьӧм вылӧ, кӧть и важиникӧсь. Комиӧн позис лыддьыны Пушкинӧс, Лермонтовӧс, Островскийӧс... Тӧд вылын на «Кыдзи калитчис сталь», «Капитанлӧн ныв», «Васёк Трубачёв да сылӧн ёртъяс»... Дерт, Нина Васильевна лыддьывліс найӧс рочӧн да кужліс вӧзйыны интереснӧй книга, а сэсся ачыс велаліс коми книгаяс лыддьыны, кӧть сёрнитліс сэки миянкӧд рочӧн. Талун этша коми морт сідзи тӧдӧ да пыдди пуктӧ коми литература, а Нина Васильевна тӧдӧ. Сылысь йӧзӧдлывлісны А. Мишарина, Е. Габова, Н. Куратова, В. Кушманов, Н. Щукин, Г. Юшков, И. Торопов, В. Безносиков, В. Напалковлӧн гижӧдъяс донъялана статьяяс. Гортса архивас эмӧсь письмӧяс Напалковлӧн и Безносиковлӧн, кодъяс аттьӧалӧны бур кывъясысь. Ачыс Нина Васильевна гижӧ кывбуръяс рочӧн. Кымын чолӧмалӧм сійӧ лӧсьӧдліс уджъёртъясыслӧн чужан лун да гажлунъяс кежлӧ, школаын медбӧръя звӧнок кежлӧ! Йӧзӧдлісны «Звезда» газетын, «Север» журналын, а ӧнія Александра Мишаринаӧн кывбуръяс лыддьывлім «Коми му» газетысь.
Уна во Нина Васильевна «Звезда» газетлӧн общественнӧй корреспондент. Сійӧ козьналіс школаласа музейӧ зэв дона альбом, кытчӧ чукӧртӧма Ыджыдвидз сикт да йӧз йылысь газетын йӧзӧдлӧм гижӧдъяс. Ыджыд аттьӧ Тіянлы, Нина Васильевна, таысь! Öд тайӧ альбомас сиктнымлӧн история!
Симпелев гозъя быдтісны 6 челядьӧс. Талун нин налӧн 12 внук-внучка да ӧти правнук. Бур гӧтыр, мам, киподтуя кӧзяйка, енбиа ань, прӧстӧ пӧсь сьӧлӧма морт, Нина Васильевналы, сора (июль) 16 лунӧ тырӧ 70 арӧс. Сьӧлӧмсянь чолӧмала Тіянӧс да сиа, мед и водзӧ олӧмныд лоӧ бур шуда, кузь нэма, тыр-бур гӧгӧрбок, мед збыльмисны кӧсйӧмъясныд!
Ольга Мишарина
Звезда. – 2010. - Сора (Июль)13 лун
