Перейти к разделу.
Спартак Степанович Казаков
Чужліс Кӧрткерӧсын 1937 вося июль 5 лунӧ. Кытысь сюрис детинкалы татшӧм нимыс? Воча кывйыс зэв прӧстӧй — Коми муысь гражданскӧй войнаса герой А. А. Маеговлӧн пи ним кузя. «Варыш» вӧлі Казаковъяслӧн матысса рӧдвужӧн.
Чужан сиктын сизим класс помалӧм бӧрын том зон пырс велӧдчыны сэки сыктывкарса на лесотехническӧй техникумӧ.
Техникум помалӧм бӧрын С. С. Казаковӧс мӧдӧдӧны Пӧдтыбок посёлокса лесопунктӧ да сэні сійӧс индӧны туй вӧчан-дзоньталан-мастерӧн. Сэсся 3 во — 1956 восянь 1959-ӧдз сійӧ служитӧ Сӧветскӧй Армияын сэкся Германскӧй Демократическӧй Республикаын.
Армияын служитӧм бӧрын локтӧ чужан сиктас, пырӧ уджавны «Кӧрткерӧсскӧй» совхозӧ техник-стрӧительӧн, прорабӧн.
Том зон гӧгӧрвоӧ, мый техникумын босьтӧм тӧдӧмлунъяс сылы оз нин тырмыны, и пырӧ велӧдчыны Горький карса инженерно-стрӧительнӧй институтӧ. Велӧдчӧм бӧрын Спартак Степановичӧс босьтӧны Коми АССР-са Министръяс Сӧвет аппаратӧ, кӧні сiйö
уджалӧ кывкутана уджьяс-вылын 1969 восянь 1995 воӧдз.
С. С. Казаковлы сетӧны Коми АССР-лӧн народнӧй овмӧсса пыдди пуктана уджалысьлысь ним.
Гижны кывбуръяс да лӧсьӧдны на вылӧ шылад кутіс пенсия вылӧ петӧм бӧрын нин, но оз ков чайтны, мый Спартак Степановичлы эз вӧвны том дырйиыс на веськодьӧсь музыка да сьыланкывъя.
«Менам суседлӧн, Лёня Казаковлӧн, вӧлі гармошка, — казьтылӧ Спартак Степанович, — буретш сы дорӧ ме тшӧкыда ветлывлі да ӧтлаын велӧдчим ворсны гармошкаӧн. Медводз велалім ворсны, «Барыня», а сэсся и мукӧд йӧктӧмъяс».
Пӧдтыбокын медводдза удждон вылӧ Спартак ньӧбӧ ичӧтик гармошка. Суседыслӧн общежитиеын вӧлі баян, весиг корсюрӧ нотаясӧ видзӧдлывліс. Но тепловозса машинистӧс баянӧн ворсӧмыс оз волі ышӧд. А Спартак, коді ньӧти эз тӧд музыкальнӧй грамота, да весиг нотаяс, кыдзи шуасны рочӧн, «на слух» велаліс ворсны баянӧн «Раскинулось море широко» сьыланкыв. Кымын водзӧ — сымын унджык велӧдіс. И со аддзам Спартак Казаковӧс солдат паськӧмаӧн да баянӧн.
«Удж вылын меным колӧ вӧлі тшӧкыда да дыр кад чӧж ветлыны командировкаясӧ - висьталӧ Спартак Степанович, — и баян кольліс «уджтӧг». И сӧмын сэк, кор нин петі пенсия вылӧ, бара кутчыси баянӧ».
Медводдза збыль музыкальнӧй гижӧдӧн (произведениеӧн) Спартак Степановичлӧн лои фокстрот, а сэсся музыка дорас сійӧ гижис кывбур.
«Кывбурыс кыдзкӧ артмис зэв ӧдйӧ, а медводдза куплетсӧ, гашкӧ час джынйӧн и гижи», - Спартак Степанович.
Ӧні С. С. Казаков гижис нин комынысь унджык сьыланкыв, и сӧмын коми поэтъяслӧн куим кывбур вылӧ лӧсьӧдіс шылад, а мукӧдыс - и кывъясыс, и музыкаыс — аслас.
Мый йылысь Спартак Степанович Казаковлӧн сьыланкывъясыс? Ичӧт дырся кад да тшӧтшъяяс йылысь, радейтана Коми му да сылӧн мичлун йылысь, муслун йылысь. Сылӧн сьыланкывъясын кылӧны ӧнія дзуг кадся сьӧкыдлунъяс, ыджыд войнаын воштӧмъяс да кад вылӧ лача.
Унджык сььыланкывсӧ С. С. Казаковлысь колӧ ворсны вальс ногӧн, но эмӧсь и марш, и танго, и фокстрот.
Кӧть Спартак Степанович эз босьт музыкальнӧй учреждениеясын грамота, нотаяс сійӧ велӧдіс самоучитель серти.
Сьыланкывъяссӧ йӧзӧдліс Кӧрткерӧс районлӧн «Звезда» газетын, республикаса «Коми му» да «Йӧлӧга» газетьясын. Эм кывбуръяс, сӧмын музыкатӧг, и «Чушканзі» журналын.
Сиам, дона лыддьысьысь, Спартак Степановичлы водзӧ вылӧ ыджыд творческӧй вермӧм и медым сьыланкывъяслӧн вӧсни на чукӧр бӧрын петас мича кывъяса да лӧсьыд шылада кыз небӧг.
Василий Попов
Ме комиын чужи... Сьыланкывъяс : [песенный сборник] -Сыктывкар, 2012,-
Пер. загл : Я родился в Коми... Песни.
