А тэ, гудöкöй, ворс

Тэнад киын ворсö-сьылö
Гудöк гажа «Шондiбан».
Се майбырöй, мича пелысь
Гöрдöдöма сэн и тан.

Öти чибльöгысь ми юим
Парма ёльсьыс ва.
Ок и чöскыд, ок и юмов
Тэнад вомдор вöлöма.

Радейтчöмлысь топыд гöрöд
Öнi некод нин оз разь.
Зарни чунькытш муса нывлы
Кöлысь кежлö лоö дась.

А тэ, гудöкöй, ворс,
А тэ кисьмы, пелысь роз,
Дзольгы – визувт сöстöм ель,
Олöм жальöн мед оз коль

Паметь лун

Муртса югыдыс сöдзтысис – пырис,
Эз на войыслöн саймовтчы бöж.
Шоныд вольпасьысь пöрысь баб чеччис,
Кисьтiс чайникö кöдзыд ва кöш.

Ен ув пельöсö сись сiйö öзтiс.
Мыйкö гусьöник кевмис зэв дыр.
Сэся пöсь чайсö стöканö кисьтiс,
Усьöм верöссö вошйöдiс пыр.

Талун паметь лун сылöн – салдатлöн.
Колис дöваöн томиник Ань.
Вöлi верöсыс уджач зэв мортöн,
Вöлi гöтыркöд, челядькöд шань.

Уна сьöкыдсö пыкны, дерт, ковмис,
Узьтöг кольöма кымын сьöд вой.
Отнас челядьсö велöдiс – быдтiс,
Морöс пытшкас öд личавтöм дой.

Баблань видзöдö том на зэв верöс,
Быттьö шуö: тэ олышт на вай.
Ен ув пельöсын öзъялö сиськыс,
Орччöн руалö дедлöн пöсь чай.

Дзоридзалан кад

Кытчö тэрмасян, кытчö котöртан?
Мэнö эновтны мыйла лöсьöдчан?
Ты бок видз вылас тэкöд пукыштам,
Чужан муыслысь лов шы кывзыштам.

Мусса томлунöй – дзоридзалан кад,
Шуда пöраöй – гöгöр, майбыр, лад.
Гажа сьыланкыв важ моз сьылыштам,
Мича дзоридзъяс öктам – чукöртам,

Катшасинъяскöд тöвру ворсыштас,
Шондi югöрыс тыö суныштлас.
Муса томлунöй – дзоридзалан кад,
Шуда пöраöй – гöгöр, майбыр, лад.

Эзысь лысванас менö мыссьöдышт,
Дзоридз маяснас юктав – чöсмöдлышт,
Муса томлунöй, эн мун – сувтыштлы,
Тайö мичлунсö мекöд сывйыштлы.

Муса томлунöй – дзоридзалан кад,
Шуда пöраöй – гöгöр, майбыр, лад.