Перейти к разделу.
Панюков Максим Александрович
родился 16 августа 1927 года в деревне Важкурья Корткеросского района.
В 1942 году уехал из деревни в город, поступил в ФЗО, но учиться не пришлось. В 15 лет отправили на работу. В 1957 году окончил лесотехническое училище и стал работать в Пезмогском лесопункте. Избирался депутатом села, был членом рабочкома, председателем профкома. С 1995 года начал сотрудничать с районной газетой «Звезда». Из-под его пера выходила не одна публикация, в основном это рассказы. Также публиковались юмористические пьесы, которые ставились на сцене сельских клубов Корткеросского района.
Умер 27 июля 2011 года. Похоронен на сельском кладбище деревни Важкурья.
Загсын (Öти юкöна шмонь) Звезда. – 2004. – 3 февраля. - Пер. загл.: В загсе (пьеса в одном действии)
Водзö вылö эн ылав
Висьт
СЕРГЕЙ пукалiс вагон öшинь дорын и видзодлiс ывласьыс вежласьысь серпассö. Котлассянь Сыктывкарöдз локтiгöн торйöн нинöм вылö эськö и видзöдлыны да. Гежöдик вöр, туй бокас кранъяс да гежöдик станцияяс, кытчö и поездыс оз сувтлы. Кöть Сергей и видзöдiс öшиньö, но нинöм эз аддзы. Юрас Сергейлöн вöлi ыджыд дум, и кымын матыстчис гортланьыс, сымын ёнджыка мöвпалiс. А Виктор другыс пукалiс воча и зунясис кутшöмкö журналын. Сiйöс нинöм эз майшöдлы. Виктор кык во служитiс армияын, сетiс ассьыс долг, а öнi свободнöй мортöн воö гортас. Сергей жö майшасис. Горт йывсьыс эз думайт, медся ёна сiйö казьтылiс Нинаöс, кодкöд кольöм во отпускас волiгöн тöдмасис. Нина лоö Виктор ёртыслöн воча чойöн. Сiйö и тöдмöдлiс найöс. Сергей да Виктор жö тöдмасьлiсны призыв дырйи военкоматын, тшöтш и мунiсны, öтлаын служитiсны. Орчча крöватьын узьлiсны, лоины бур ёртьясöн. Сэки и Викторыс сетiс чойыслысь адрессö. Найö и кутiсны письмöасьны. Дерт, Ниналöн письмöясыс вöлiны быттьö кö-дзыдöсь. Сергей эз на некор гижасьлы нывъясыдкöд да нинöм эз и казяв, сылы вöлi долыд.
Колян воö отпускас волiгас зон тöдмасис Нинакöд. И джын отпусксö олiс Нинаясын. Служба бöрын кöсйысис локны сы ордö. Кöть Нина вöлi зэв збой, ёсь сёрниа нывка, Сергейлы зэв кажитчис.
Сергей вöлi сизим арöса, кор кулiс мамыс. Сiйö воас жö Сергей пырис школаö. Вöлi нöшта ичöтджык вок. Эз на коль и во мамыс кулöм бöрын, батьыс вайис выль гöтырöс. Во мысти налöн чужис пи, а кык во мысти - нöшта öти пи. Семья лои ыджыд. Батьыс уджалiс совхозын механикöн. Кыдзи помнитö Сергей, тьöткаыс эз вöв лёк мортöн, эз кучкывлы, эз горзывлы. Кыдзи медыджыд воклы сылы вичмылiс быдсяма уджыс. Тьöткаыс тшöтш уджалiс совхозын. Сергей вöлi первой отсасьысьöн горт гöгöрыс: «Сергей тайöс вöч, Сергей сiйöс вöч, Сергей сэтчö ветлы...» Зэв вöлi обиднö. Му-кöдторсö позьö вöчны и ичöтджыкъясыслы, а тьöткаыс век Сергейöс ыстö. Коркö и зонка шуис быттьыслы: менö пö тьöтка оз радейт, век ыстö кытчöкö син водзсьыс. Батьыс серöктiс да шуис: тэнö пö од öз тшöктыны вöчны, мый он вермы. Сергейлöн вöлi нöшта баб, кодi олiс торйöн, мам чой ордас. Коркö зонка норасис и бабыслы, мый тьöткаыс сiйöс оз радей, öтдортö. «Тэ дзик мамыд кодь, -шуис бабыс, - гашкö, сыöн онджык сылы кажитчы. Но тьöткаыд абу лёк морт. Медыджыд пиыдлы век медуна сюрö уджыд».
Сергей быдмис зэв рам детинаöн, кывзысьысьöн, некор тьöткаыслы эз ыръянитлы, батьыслысь кывзысис и. Кöкъямыс класс помалöм бöрын Сергей велöдчис сельхозтехникумын механикö, а помалöм бöрас дзик пыр босьтiны армияö. Служитiс Москва бердса öти воинскöй частьын.
Сыктывкарö вотöдз на вагон кузя ветлöдлiс чиганка да гадайтчис. Матыстчис и зонъяс дорö, но-ко пö, салдатикъяс, вай гадайта, мый тiянöс виччысьö водзö, ставсö висьтала. Миян салдатъяслöн пö деньгаыд абу, эн полöй, ме уна ог босьт, тупöсь нянь вылö кö сетад и. Но вай пö, он кö кöсйы миянöс ылöдлыны, шуис Виктор. На пö чег картiсö шöри. Виктор торйöдiс колодасö да сетiс чиганкалы. Сiйö восьтiс öти картi, мöдöс да шуис, тэнад пö туйыд оз помась. «Кутшöм туй? -чуймис Виктор, - ме армияысь локта гортö, кутшöм нöшта туй вермас лоны». - «Ме сэсся нинöм ог висьтав, мелоч вылад, - шуис чиганка. - Кöсъян кö тöдны, деньгатö содты».
Чиганкаыд бергöдчис Сергейлань, но-ко, касатик, чег картiсö. Сергей чегис колодасö да сетiс чиганкалы. Сiйö восьтiс öти картi, видзöдлiс Сергей вылö, восьтiс мöдöс. Дыр видзöдiс зон вылад да шуис: «Ог вежав тэныд судьба вылö, тэнö виччысьö кык омöльтор». Сiйö тупкис колодасö да вешйис, весиг сьöмсö эз босьт. Вот сэсянь и Сергей лои жугыль.Сьöлöмын кутшöмкö полöм вöлi.
Сыктывкарсянь ёртъяс мунiсны автобусöн. Сергей лун-мöд кöсйис олыштны гортас да волыны Викторъяс сиктö сёрнитны Нинакöд. Гортас Сергейöс виччысисны нин. Сiйö öд гижлiс, мый регыд локтас.
Медводдза омöльторйыс виччысис жö. Батьыс куйлiс карса больничаын, кöсйöны пö вöчны морöсас операция. Сергей зэв ёна кöсйис сёрнитны сыкöд Нина дiнö мунтöдз. Тьöткаыс кöть и вöлi рад гортö воöм салдатлы, но сылы Сергей ассьыс думсö эз висьтав. Сергей мöд лунас жö мунiс карö батьсö видлыны. Сылöн дзоньвидзалуныс вöлi лёк, и некутшöм сёрнитöм эз и ло. Мöдысь на эськö ветлiс батьыс дорö, но сёрни бара эз артмы, батьсö эз кöсйы шызьöдны.
Гортас вежон олöм бöрын Сергей мунiс ёртыслöн сиктö. Дерт, первой пырис Викторъясö. Но сiйö гортас эз вöв. Мамыс висьталiс, мый Виктор мунöма Ленинградö подготовительнöй курс вылö, мед пырны институтö. Нöшта висьталiс, мый Ниналöн эм нин Сергейсянь кага. Зонмыд быдöн шöйöвошис. Нинаыс нинöм эз гижлы, мый рушкуа. Зэв öдйö мунiс Нинаясö. Нина да сылöн бать-мамыс Сергейöс вочаалiсны зэв бура. Нина дзик пыр мыччис Сергейлы кагасö, шуис, то пö, Вовочка, тэнад батьыд. А Сергей писö весиг киас босьтны оз куж. Колöкö, яндысис либо полiс. Тадзи и примитiсны зятьпуöс, ставöн радöсь лоины.
Рытнас пызан сайын чукöртчылiс рöдвужыс, чолöмалiсны Нинаöс да зятьпуöс. Некымын лун мысти том йöз шуисны гижсьыны. Но Сергей кöсйис, мед батьыс петас больничаысь. Сiйö нöшта ветлiс батьсö видлыны, но сылы нинöм на эз висьтав. Гижсьöм йылысь заявление сетiсны, виччысисны ба-тьыслысь бурдöм.
Сергей пырис уджавны совхоз гаражö. Пока пö слесарав, а бöрас видзöдлам, шуисны сылы.
Коркö öти том морт гаражас юалiс Сергейлысь: кагаыс пö тэнад? Мöдыс чуймискодь да шуис, дерт, пö менам, кодлöн нö сэсся. Юалысьыд сöмын серöктiс. Нинаыдлöн пö тэöдз вöвлi гоз-мöд жöник. Татшöм сёрниыд эз кажитчы Сергейлы, но нинöм эз шу. Юрас жö тайö сёрниыс колис. Недыр мысти öти тракторист бара на юалiс:
- Гижсид али эн на? Кагасö ас вылад босьтан али он?
- Эг на гижсьöй, а кагаыс менам и, дерт, босьта. А мыйла юасян?
- Гижсид али эн, тайö тэнад делö. А кагаыс абу тэнад, юав Нинаыдлысь, кор сiйö чужлiс, и гöгöрвоан.
Тайö сёрни бöрас кыдзкö эз ло лöсьыд. Рытнас пыр жö юалiс Ниналысь, кор пö кагаыд чужлiс. Аски пö верма петкöдлыны чужан гижöдсö, шуис Нина. Но чужан гижöдсö эз петкöдлы ни аскинас, ни вежон мысти. Бöрас шуис, вошис пö. Коркö Сергей Виктор мамыслысь юалiс: кор пö чужлiс Ниналöн кагаыс?
- Тэсянь кö быттьö кагаыс да дзоньвидза кö, чужис эськö июньын, а кагаыс Нинаыдлöн чужлiс апрельын, - шуис сiйö. Рытнас Сергей нöшта на юалiс Ниналысь, но сiйö висьталöм пыдди пинялiс.
Аскинас гаражас зонмыд юалiс öти шоперлысь, кодкöд Нинаыс гуляйтлiс.
- Нинаыдлöн вöлi нин гоз-мöд жöник, - висьталiс сiйö, - и ачыс оз тöд, кодлöн кагаыс. Сöмын абу тэнад. Тэ зэв лабутнöй, лöнь морт, и миянлы тэ жаль. Кытчöдз ачыс тэнö эз вöтлы да эн удит гижсьыны, мун сы дорысь. А код тöдас, колöкö, тэнö и терпитас кага пондаыс.
- Тэ менö пöръявлiн, - рытнас Сергей бара панiс сёрни Нинакöд. - Меöдз тэ вöлöмыд нин рушкуа.
- Эн кывзы быдöнлысь сёрнисö, нямöд. Нямöд и эм. Ог кö кажитчы, мун дай, кутны ог вермы.
Та бöрын гозмöд лун Нина эз шыасьлы, и Сергей пыр олiс ланьтöмöн. Коркö öтчыд удж бöрас чукöртiс чемоданö кöлуйсö и петiс Виктор мам ордö, а аскинас мунiс ас сиктас. Батьыс больничасьыс вöлi локтöма нин. Сергей ставсö висьталiс сылы. Бур пö, мый абу удитöмыд гижсьыны. Гöтырпуыд пö сюрас, сöмын эн нин ылав водзö вылö.
Звезда. – 2003. – 19 апреля.
