Перейти к разделу.
Томӧсь да енбиаӧсь
Март помын Коми небӧглӧн лунӧ челядьлӧн Самуил Маршак нима Национальнӧй библиотекаын котыртлісны «Творчестволысь школа». Волісны сэтчӧ Кӧрткерӧс да Сыктывдін районъясысь, Сыктывкарысь чужан кыв вылын гижны босьтчысь ныв-зон.
На пиысь унджыкыслӧн кывбур-висьтъясыс петалісны нин небӧгъясын, и найӧ ёна нимкодясисны, кор аддзисны ассьыныс гижӧдъяссӧ «Томӧсь да енбиаӧсь» выставка вылын петкӧдлӧм книгаясысь.
Сёрнитісны накӧд и гырысьджык ёртъясыс, республикаса гижысьяслӧн союз бердын лӧсьӧдӧм литература котырысь том поэтъяс Алёна Шомысова, Любовь Ануфриева, Алена Старцева, Татьяна Кирпиченко, Василий Чупров, висьталісны гижан уджын асланыс медводдза вермӧмъяс йывсьыс. Вӧлӧмкӧ, Алёна Шомысоваӧс Чехия йылысь кывбур чукӧрсӧ лӧсьӧдны ыззьӧдӧма Прагалӧн архитектураыс, а Татьяна Кирпиченко гижӧдъяссӧ медвойдӧр петкӧдлӧ нывъёртъясыслы. Алёна Старцева радейтӧ гижны вӧр-ва йылысь, Любовь Ануфриева медводдза кывбурсӧ тэчӧма мӧд классын велӧдчигас, а Василий Чупров босьтчӧма таӧ сӧмын кольӧм во на, но кывбуръяссӧ йӧзӧдӧмаӧсь нин «Ижемский характер» небӧгын.
Людмила Втюрина да Зоя Шиликова эз сӧмын кывбуръяссӧ лыддьыны, но и висьталісны, кыдзи колӧ гижны. На серти, колӧ радейтны да видзны чужан кывтӧ, ёнджыка сёрнитны сы вылын, а верстямман да — велӧдны сыӧ и ассьыд челядьтӧ.
Мастер-класс нуӧдіс Елена Афанасьева, донъяліс челядьӧн вайӧм кывбур-висьтъяс, сылӧн ышӧдӧмӧн жӧ ныв-зон дасьтісны неыджыд кывкуд, кытчӧ чукӧртісны мича эпитетъяс, синонимъяс.
Алёна Нестерова
Коми му. – 2012. – 5 апреля
