Перейти к разделу.
Том гижысьяс велӧдчисны творчестволӧн школаын
Матӧ 10 во сайын Кӧрткерӧсса шӧр библиотека босьтчис пӧртны олӧмӧ зэв тӧдчана да колана моготсавны районса том кывбуралысьяслы сӧвмӧдны кужӧмлунсӧ, паськыда тӧдмӧдны йӧзӧс налӧн сӧдз да сӧстӧм уджъясӧн, ыштӧдны енбиясӧс лӧсьӧдны выль гижӧдъяс. И со кольӧм вежонӧ гижысь томуловӧс чукӧртлісны «Творчестволӧн школа» ним улын мунысь районса велӧдан семинар кежлӧ. Сійӧс нуӧдны отсӧг вичмӧдіс Финляндияысь М.А. Кастренлӧн котыр.
Тайӧ пӧрйӧ кык лунся (муніс рака 24-25 лунъясӧ) семинар кежлӧ волісны Шойнатыысь, Висерысь, Ыджыдвиддзысь, Пӧддельнӧйысь да Одыбысь ныв-зон асланыс веськӧдлысьяскӧд-велӧдысьяскӧд. Медводдза лунӧ томпоэтъяскӧд удж пансис Кӧрткерӧсса челядьлӧн библиотекаын. Челядьӧс кыпыда чолӧмалісны библиотекаын уджалысьяс, неыджыд козин-концерт петкӧдлісны Кӧрткерӧс районса искусствояс школаысь быдтасъяс. А сэсся ныв-зонъяс водзын сёрнитіс Коми Республикаса гижысьяслӧн Котырысь литература консультант Анжелика Елфимова. Миян районысь петлӧм нималана кывбуралысь висьталіс гижан уджӧ босьтчӧм да сӧвмӧм йылысь, лыддис ассьыс кывбуръяссӧ, кывзіс челядьлысь кывбуръяснысӧ лыддьӧм, ӧнія кадся коми поэтессакӧд аддзысьлӧм да сыкӧд ёрта сёрнитӧм бӧрын томулов колины дӧвӧленӧсь. Но найӧс виччысис вель уна на радла-
на виччысьтӧмтор...
Пажын бӧрын том поэтъяслӧн котыр воліс юрсиктса музейӧ, а рытгорув енбияслӧн «десант» мӧдӧдчис Пезмӧгӧ. Пезмӧгсаяс зэв жӧ шоныда примитісны гӧсьтъясӧс. Сэтчӧс библиотекаын лӧсьӧдӧм музейын найӧ тӧдмалісны сиктлӧн история йылысь, «Барышни-крестьянки» нывбабаяслӧн клубӧ пырысьяс нуӧдісны нывзонкаяс пӧвстын ворсӧм-ордйысьӧмъяс, аддзысьлісны «Чужан му туялысь» клубӧ ветлысь томуловкӧд. Рытсӧ челядь коллялісны Пезмӧгса турбазаын: шойччисны, бура тӧдмасисны ӧта-мӧдныскöд.
Семинарлӧн мӧд лун йылысь миянлы висьталіс Шойнатыса челядьӧс туйдысь-велӧдысь, том кывбуралысьяслысь кружок нуӧдысь, районса нималана кывбур тэчысь Зоя Шиликова:
- Воим Сыктывкарӧ и медводз мунім Печать керкаӧ. Сэні миянӧс пӧся, мелі нюмӧн паныдаліс Ганна Холопова, «Коми му» газетса коммерческӧй директор. Водзӧ тӧдмасим «Чушканзі», «Коми му», «Войвыв кодзув», «Йӧлӧга» газет-журналъяслӧн редакторъяскӧд. Велӧдчысьяслы зэв кажитчис Печать керкаӧ ветлӧмыс.
Пажын бӧрын волім Коми Республикаса гижысьяслӧн Котырӧ да Финн-йӧгра культура шӧринӧ, кӧні аддзысьлім республикаса гижысьяскӧд: Елена Козловакӧд, Николай Щукинкӧд, Владимир Тиминкӧд, Нина Куратовакӧд, Любовь Ануфриевакӧд, Алёна Шомысовакӧд да Юлия Нефёдовакӧд. Челядь кывзісны налысь висьталӧмсӧ, а сэсся лыддисны ассьыныс кывбуръяснысӧ. Та кындзи ныв-зонкаяс тӧдмасисны «Финноугория* юӧра сайтӧн. Семинар помын челядьӧс корисны пырӧдчыны Гожся университетлӧн конкурсӧ.
Зоя Шиликова сідзжӧ висьталіс ыджыд аттьӧ ас и велӧдчысьяс нимсянь семинар котыртысьяслы - С.А. Челпановалы, А.И. Потаповалы да В.В. Шестаковалы. Тавося семинар-велӧдчӧмыс пӧ челядь вежӧрӧ коляс нӧшта на бурджыка. «Миян школаса том гижысьяслы шуд усис пырӧдчывны тайӧ мероприятиеас. Кӧрткерӧсса шӧр библиотека вель уна во нин нуӧдӧ творчество школа том поэтъяс пӧвстын. И миянлы удайтчыліс волыны быд татшӧм велӧдчӧм вылӧ, ӧд пырджык сійӧс котыртлӧны тувсовъя каникулъяс дырйи», - кывкӧрталіс Зоя Васильевна.
Пасъям, мый том гижысьяскӧд удж сӧмын велӧдан семинаръясӧн эз на помасьлы: налӧн творческӧй уджъясыс пырисны Кӧрткерӧсса шӧр библиотекаӧн лэдзӧм ӧктӧдъясӧ (сборникъясӧ). Сэтысь позьӧ аддзыны ловбиа кывбуръяс, проза гижӧдъяс, серпасъяс.
Шудаӧсь тайӧ томуловыс! Шудаӧсь сыӧн, мый эм налӧн торъя енби - ассьыныс сьӧлӧм кылӧмъяснысӧ кужӧны петкӧдлыны чужан коми кывъясысь тэчӧм кывбуръясын. А бур наставникъяс-велӧдысьяс отсаласны водзӧ сӧвмӧдны кужӧмлунсӧ, веськӧдасны колана туйвизь- нырвизьӧ.
Оксана ГУДЫРЕВА.
Звезда. – 2010. - 30 марта
