Перейти к разделу.
Гижны тшӧтш колӧ велӧдчыны
Звезда» газетлы 65 во тырӧмкӧд йитӧдын редакция челядьлӧн районса шӧр библиотекакӧд котырліс гижысь том войтырлы «Творчество школа» семинар.
Районын гижысь томуловыс уна. Налысь уджъяссӧ йӧзӧдлӧны и «Йӧлӧга» газетын да «Би кинь» журналын, тшӧтш и районса «Звезда» газетын.
Миян районысь петӧм творческӧй йӧзыд пыр вӧліны. На пиын и гижысьяс, и журналистъяс. Бӧръяясыс и збыль уна. Ыджыд пай таын, дерт, велӧдысьяслӧн. Найӧ и чужтӧны татшӧм енбиа йӧзсӧ. Ме пыр казьтыла Нёбдін сиктса школаын драмкружокӧ ветлӧм (веськӧдліс Нина Фёдоровна Каракчиева) да Шойнатыса школаын Ангелина Михайловна Захаренколӧн урок дырйи музыка улӧ сочинениеяс гижӧм. Гашкӧ, тайӧ и чужтіс меын журналистӧс.
Нина Федоровна ӧні на велӧдӧ гижан уджӧ челядьӧс. Важӧн нин жӧ уджалӧ Шойнатыын «Би кинь» литература кружок. А веськӧдлӧ сійӧн Зоя Васильевна Шиликова. Сійӧ ачыс тшӧкыда кывбуръяс гижӧ. Тайӧ уджас велӧдӧ и быдмысь войтырӧс. «Звезда» газетлы 65 во тырӧмкӧд йитӧдын налы да нӧшта челядьлӧн шӧр библиотекалы редакциясянь сетім Аттьӧалана письмӧяс.
А семинар муніс водзӧ. Медводз чукӧртчысьяс водзын сьылісны- йӧктісны Кӧрткерӧсса челядь. «Йӧлӧга» газетса шеф-редактор Виктория Пименова висьтыштіс наӧн да СГУ-са финн-йӧгра фа- культеткӧд котыртӧм «Кӧсъя лоны журналистӧн» конкурс йылысь. Медыджыд козиныс - университетлӧн тайӧ факультетӧ конкурстӧг пырӧм кывъяс висьталісны и карысь гӧсьтъяс - челядьлы гижысьяс Елена Козлова да Елена Габова.
- Ме тӧда, мый тіян эм кӧсйӧм гижны, - шуис Елена Васильевна Козлова. - Сідзкӧ колӧ гижны, тшӧтш и велӧдчыны колӧ, медым кужны вӧдитчыны кывнас.
А Елена Васильевна Габова асьсӧ лыддьӧ миян районсаӧн жӧ.
Батьыс сылӧн Типӧсиктса.
- Ме радейта ветлывлыны Типӧсиктӧ, - висьталӧ гижысь. - И сьӧлӧмӧс бурмӧдӧ сэні, мый сиктыс зэв идӧра.
Бӧрас челядь торйӧдчисны секцияяс вылӧ. Коді гижӧ рочӧн, сёрнитісны Елена Габовакӧд, коді комиӧн - Елена Козловакӧд. Ныв- зон лыддисны нималана гижысьяслы ассьыныс кывбуръяс, а найӧ вӧзйӧмъясӧн велӧдісны, кыдзи бурджыка лӧсьӧдны кывбур.
Эдуард Пименов
Звезда. – 2005. – 9 апреля
