Перейти к разделу.
Бур гижысьöн лоан сӧмын ёна зільӧмӧн
Кос му (апрель) 24 лунö Кöрткерöсса челядь библиотекаын котыртсьылiс творчество школа
Тайӧ школаыс сэтшӧм ныв-зонлы, кодъяс вӧчӧны медводдза воськовъяс литератураын: зільӧны гижны кывбуръяс, видлӧны асьнысӧ прозаын. Но медым гижӧдыс вӧлі тыр-бурӧн быд боксянь, дерт жӧ, колӧ, мед том йӧзлы отсалісны нималана нин гижысьяс бурджыка восьтыны мӧвпнысӧ, корсьны стӧчджык образъяс.
И со Кӧрткерӧс районса челядьӧс велӧдны да туйдыны волісны Коми Республикаса паськыда тӧдса гижысьяс Владимир Тимин, Елена Козлова, Елена Габова, Алёна Ельцова.
- Видзӧдлӧй: куимнан гижысь аньыс Еленаӧс, - шуис Елена Габова том войтыр водзын сёрнитігӧн. - Сідзкӧ, став Еленаыс - аскиа писательяс.
Аньяс бӧрын сёрнитіс Владимир Тимин. Сы кывъяс серти, овны литератураӧн, сідзкӧ, быдмыны гижысьяслӧн Союзӧ пырысьӧдз. Тӧдны пӧ кутасны оз сӧмын республикаын, но и сы сайын. Но медым лоны бур гижысьӧн, быть колӧ ыджыд зільлун. Мортыслӧн енбиыс сӧмын 2-3 прӧчент,
97 прӧчентыс - сійӧ уджачлун, удж радейтӧм. Колӧ ёна лыддьысьны, лоны смелӧн, оз ков повны сёрнитны.
Роч да коми кыв озыр интонацияясӧн, и кывбур гижигӧн колӧ кужӧмӧн наӧн вӧдитчыны.
Сы йылысь, мыйджык вылын колӧ на уджыштны гижӧдъясын, сёрнитісны нин секцияяс вылӧ юксьӧмӧн. Быдӧн чеччыліс да лыддис ассьыс гижӧдсӧ, а сэсся ӧтув видлалісны.
Семинар дырйи вӧлі и районса администрацияысь юралысьӧс вежысь, велӧдан управлениеӧн веськӧдлысь Мукминат Атуева.
Татьяна Деменко
Звезда. – 2007. – Ода кора (Май) 11 лун
