Коми легенды о музыкальных инструментах

Висер вожса öнись дядьлöн висьтъяс да мойдъяс.

Кöнкö татöнi матын, миян Коми муын, дзоляник сиктын овлöма зэв шань да бур сьöлöма пöльö. Сиктсаыс ставныс, гырысь и посни войтырыс, шуöны вöлöм сiйöс öнись дядьöн. Öнись дядь вöлöма зэв нин пöрысь, сирöд мыр кодь, кыдз шулöма ачыс пöльö. Сiйö вöлöм зэв мастер морт быдторсö кужлöма вöчны. Пöчöяс ыдждöдлöмаöсь сiйöс зарни киа мортöн. Вöчас вöлöм пуа кöлуйтö, серпасалас быдсяма дивö кодь серпаснас, да любö киад босьтны. Синтö дыр он вермы вештыны тайö чача кодь мича лöсьыд вöчöмторсьыс. Пöльöлысь уна вöчöмтор öнi на позьö аддзыны коми йöзлöн керкаясысь. Тайö и печканъяс, чöрсъяс, и чуман-пестеръяс, и туисъяс, и пельсаяс, и нöшта на уна мукöд пöлöс сюмöда-пуа кöлуй.

А челядь, лов шысö дзебöмöн, пуксьöмаöсь öнись дядь гöгöр да кывзöны сылысь варовитöмсö, мойдöмсö, öти кыв оз воштыны, ставсöпель гöгöрыс гартöны.

Ме öнись дядь моз жö висьтала-мойда челядьлы коми йöз йылысь легенда сяма мойдъяс, висьтъяс, велöда ворсны быд пöлöс ворсанторнас да сьывны мича коми сьыланкывъяс.

Попов, Г.И. Кыдзи чужö сьыланкыв/ Г.И.Попов. - Сыктывкар. 1999. – С. 34. – Пер.загл.: Как рождается песня.

Ворсан табъяс (трещетка)

Менам ыджыд батьö, Мефодий Романович Попов – сиктса ногöн Рöман Поди, вöвлöма зэв шмонлив мортöн. Уна вöлöм мойдкывъястö тöдö. Ас наукаöн перйылöма грамота. Мойднысö велöдчылöма батьыслысь ветлiг-мунiгъясöн, гын сапöг вöчигъясöн. Мойдöма «Дальнöй вöр», «Правда да кривда», «Китрöсть-мудрöсть» да мукöд мойдъяс.

Вöвлöма империалистическöй да гражданскöй война фронтъяс вылын. Некор абу усьлывлöма шогö. Зэв гажа морт вöлöма.

Öтчыд крам праздник дырйи, Иван лунö, чукöртчасны гöстьяс налöн керкаö. Заводитчас гаж. Босьтчасны ворсны: кодi гудöкöн няжгö, кодi пу паньясöн тотшöдö, кодi бедьясöн котшöдö, а кодi и сьылö «Шондiбан». Зэв мичаа артмö.

Ыджыд батьлöн керка стенас вöлöм öшалöны-косьмöны кöв вылын тывлы вöчöм табъяс, кызь кымын. Видзöдас-видзöдас сiйö табъяс вылад да босьтас киас. Кöвйöдыс öшöдас сьылiас да кутас сьылöм-ворсöм улас швачöдны табъяснас воча-воча. Ок и мича артмас! Ёна и гажöдчасны сэки. Уна частушка сьыласны, кадриль йöктасны. И быд ворсöм улö батьö тшöтш ворсö табъяснас. Зэв ёна кажитчас табнад ворсöмыд, да сэсся тайö табъяссö абу и пысавлöмаöсь тывъясас. Дыр видзöма да ворслöма наöн ыджыд батьö. А сэсся тай кытчöкö саймовтчöмаöсь, вошöмаöсь. Ме эг нин аддзыв.

Гашкö, сэсянь и паськалiс, и öнi на со гажöдöны миянöс сьылiг-ворсiгъясöн. Ёна жöчелядь радейтöны швачöдны-ворсны «Шондiбан» улад тайö мича ворсан табъяснас.

Попов, Г.И. Кыдзи чужö сьыланкыв/ Г.И.Попов. - Сыктывкар. 1999. – С. 34. – Пер.загл.: Как рождается песня.

Сартас (лучина)

Кык сартас киö

Босьтi ме сiйöн:

Ворсыштны окота!

Вот кыдзи тотшкöда

Тотш – тотш – тотш…

Важöн, кор эз на вöв тайö югыд электричество биыд, миян пöльяс да пöчьяс пемдöм бöрын югзьöдлiсны керка пытшкöссö пеша отсöгöн. Пешаыс артмö куим торйысь: пеша вор, кытчö кисьтывлiсны ва, медым сартасыс ломтысьöм бöрас öгырнас усяс пеша воръя ваас да кусö. Пеша вор весьтас вöлi сартас кутан. Тайö куим вожжа кöрт тувъялöма пеша вор помас. Сэтчö и сюйлiсны сартас помсö. Сартассö лöсьöдлiсны стöч пеша вор весьтас и сартасыслысь помсö öзтылiсны.

Сартассö вежыньтлiсны-нёровтлiсны сiдзи, медым биыс эз кус, но и эз ёна одйöн сотчы, а югзьöдiс öтмозаджык.

Тадзи пöль-пöчным сартаса би улын коллявлiсны кузь арся да тöвся рытъяссö. Мыйкö вöчлiсны горт гöгöр некор эштывтöм уджсö.

Батьыс брунгылiс-летлiс шоныд гынкöм вылö небыд вурун, мамыс да пöчыс печкылiсны-кылiсны став семьяыслы шоныд кепысь-носкияс, а дзоляньык чоя-вока пукалiсны пеша дорын да видзисны би. Вокыс чегöм коса пуртöн юклiс ёна косьтöм, веськыд сьöмöса коз пу пескысь сартас, а чоюкыс лöсьöдчöма нин вежны öзъялысь бырысь сартас коляссö выльöн.

Бруньки-бруньки сьылö батьыслöн биток улын вуж. Батьыс мыйкö мургö вомгорулас, видзöдлывлö ныв-пи вылас, быттьö арталö:

мыйта нö вурун ковмас гынкöм вылöкагаясыслы.

Пöчыс да мамыс печкиг-кыигмозыс тшöтш жö сьылыштöны олöм-вылöм йывсьыс ли мый ли.

Детинка дугдiс юкасьöмсьыс, лэптiс юрсö да кывзысьыштiс мургöм-сьылöм шыас, видзöдлiс киас босьтöм сартасъяс вылö да кык сартасöн воча-воча тотшкöбтiс öтчыд-мöдысь. Сэсся кутiс тотшкöдны бруньгöм- мургöм шыыскöд öтсöгласöн. Артмис зэв мичаа. Чойыс нимкодьысла кекöначасьны кутiс.

Би видзöмсö весиг вунöдiс, да би коляс сартас торйыскöд тшöтш уси пеша воръяс, дзожмунöм сöмын кылiс.

- Но, мокасьтаяс, лэбзинныд тай дзикöдз, - ропкыштiс пöчыс.

- Нинöм, нинöм, бара на биясям,- шуис батьыс да кыскис зепсьыс тыв кöртсö. Гольскыштiс гоз-мöдысь изъяс. Би кодзувъясыс сöмын сявкнитiсны. Биыс регыд и кутчысис биасян тшакас. Батьыс босьтiс кос сартассö да тшак вылас пöлялöмöн öзтiс сартассö.

- На, пиö, сюй пешаас да энö нин сэсся ылалöй, а аски югыднас батьыслöн сигудöк улö тотшкöдчыштанныд-ворсыштанныд сартасъяснад, зэв тай лöсьыда артмö.

Попов, Г.И. Кыдзи чужö сьыланкыв/ Г.И.Попов. - Сыктывкар. 1999. – С. 34 – 35. – Пер.загл.: Как рождается песня.

Шур – шар (шаркунок)

Кыдз пу йöгысь лэчыд пуртöн

Батьö вундiс мича дар,

Сэсся сюмöд торйысь вöчис

Ворсны миянлы шур – шар.

Важöн лавкаясад челядьыдлы ворсанторъясыд эз вöвны. Öнi öд быд пöлöс Шур – шарыс и «дудкаыс» (кыдз челядь шуöны), машинаыс и тракторыс, гудöкыс и аканьыс эм, а сэк эз вöвны. Челядьыслы батьясыс да мамъясыс асьныс вöчлiсны быдпöлöс чачасö да ворсанторъяссö. Тадзи жöи «шур – шарыд» артмис.

Дзоляник чоя-вокалöн, öксиньлöн да Закарлöн, батьыс водз асывнас на ветлöма мöс видз давйö сюмöд кульны. Мукöдлаас эськö эмöсь жö кыдзьясыс, но мöс видз дав бокас найö мичаöсь, веськыдöсь да буретш колана кызтаöсь. А батьыс налöн зэв киподдуя морт: вöчалö и туисъястö, и чуманъястö, и пестеръястö. Сэтшöмöс вöчас, мый акнитан. Да и мыйсö сöмын оз куж вöчны мусса батьныс öксиньлöн да Закарлöн.

Ыджыд сюмöд нöбйöн батьыс пырис керкаас да пуктiс сiйöс джоджö. Чышкыштiс пöсьсö да вештыштiс сюмöд нöбсö аслас пельöслань. Сэнi сылöн быд пöлöс струмент-вöчасянторйыс öшалö-куйлö аслас местаын. Стенын летчан вуж, биток, вурунраз, кий (öшöдöма кöв вылö), шыран да нöшта мыйсюрö колана посни кöлуйыс. Лабич улын ящикъясын балаяс, тюрöкъяс, мукöд гындысян кöлуйыс. Сэнi жö, мöд ящикын, пуа кöлуй вöчан струмент.

Чöскыд кöвдумъясöн пöсь тшай юöм бöрын батьыс босьтчис вöчавны дзоляник кöлачуман ичöт нылукыслы, öксиньыслы. «На, - шуö, - öкты озтö да öмидзтö». Öксинь босьтiс чумансö киас, члюбöысла кывсö мыччöмöн видзöдлiс гöгöрбок да малалыштiс сiйöс, быттьö ловъяöс. Чужöмас и быдсöн зэралыштiс. Сэсся вугйöдыс босьтiс да джоджöд йöктiгмоз ветлöдлыны-сьывны босьтчис.

Закар вöлi чöскыд да рöшкыд сукарöн тшай юö. Видзöдiс-видзöдiс да шуис: «На, öксинь, сукарсö кöть новлöдлышт чуманад, мый нö куш чуманнад йöктан?» Пуктiс öксиньлы чуманас куим-ö-нёль сукар тор. Öксинь заводитiс летйöдлыны чумансö

Öтарö-мöдарö и - дивö, чуманыс кутiс сьывны: шур–шар, шур– шар…И öксинь тшöтш кутiс сьывны: «Шур–шар, шур–шар...»

- Со тэныд и гудöк, - сералöЗакар.

Öксинь крукасис джодждöраö да усис. Чумансö кисьыс эз лэдз, а сукарыд гузьгысис-киссис джоджö. Öксинь бöрддзис.

- Но, но, эн лимзав, шань, - бурöдiс нывсö батьыс. Син пöвсö читкыртöмöн мöвпалыштiс, нюммунiс да шуис:

- Вай, нылук, пуксьыштлы. Ме тэныд, нолтö, вöча сэтшöм чуман, мед сэсся кöть и усян – нинöм оз киссьы сэтысь, да пыр кутас сьывны чуманыд.

И вöчис нылукыслы мича зарни рöма сюмöдысь лöсьыд ворсантор «шур-шар».

И öнi на зэв радейтöны ворсны челядь татшöм ворсанторнас, шур-шарнас.

Попов, Г.И. Кыдзи чужö сьыланкыв/ Г.И.Попов. - Сыктывкар. 1999. – С. 35 - 36. – Пер.загл.: Как рождается песня.

Пу жыннян (деревянный колокол)

Гашкö тайö збыль, а гашкö и абу. Но ме кыськö кывлi со кутшöм вöвлöмтор: öти дзоляник грездын овлöма пöльö. Кужö вöлöм мойдны важся коми мойдъяс, сигудöкöн ворсöмöн сьывны быдсяма сьыланкывсö. А тайö грездсяньыс катыдланяс вöлöма шор, а шор помас – пос. Сэтi вöлöм туйыс нуö ыджыдджык сиктö. И вöлöма тайö местаыс зэв шуштöм. Козъя-понöля да тусяпуа-баддяин. И нимтылöмаöсь сiйöс Опоня горув.

Мыйла да кодi шулöма тадзисö – некод оз тöд.

Танi вöлöм зэв частö да уналы каститчö: то кузь сьöд вöсни морт паныдалö-повзьöдлö, то нöшта мыйкö мöдтор. Но медъёна вöлöм норасьöны грездса да ветлысь-мунысь ямщикъяс. Мунан пö вöлöн, мунан-пукалан доддьын, дзонь вöлöк вуджан, и нинöм. А Опоня горув чой лэччыны кутан да сьöлöмыд чеччыштö нин, полан. И тшукысь öд сöмын на вöлыд тувччас шор пос вылас - гиль-голь вöлыд лэдзассяс. Да öд öтилöн кö, мед. Унаöн öд висьталöны тайö дивöсö. Мыйсö сöмын оз вöчлыны вöлöн ветлысьяс. И нимкывъяс лыддьывлiсны, и молитваяс сьывлiсны креститчöмöн, и гора жыннянъяс кöртавлiсны мегыраныс – гашкö пö, мутиыс ловзяс, да кысь тан.

Öти мужик, эськö зэв повтöм вöлöма, да и вöлыс вöлöм биа-бордъякодь. Сiйö чой йывсяньыс öтчыд öддзöдчöма, да и кöрöба-даддя топыда тшамъясьöма-кутчысьöма шутёвтны-пызйыштны кöсйöма шор поскöдыс, Опоня горулöд, но.. Вöлыд пос шöрад тран сувтас, и мегырыс гиль-гольмунö-усьö, быттьö додь вожъясас абу и пысавлöмаöсь. Куимысь доддясьлас мужикыд – пыр лэдзасьö. Сэсся тай кыдзкö мынас жö сэтысь.

Со öтчыд кутшöмкö вина-сура праздникö пöльö ордö чукöртчасны мужикъяс. Даръясьыштöм бöрын пансяс сёрни каститчöмъяс йылысь. Быдсяма эмсö и абусö висьтавласны öта-мöдныслы. Кодкöд мый лоöма. Кодi мый аддзывлöма да кывлöма. Страшнö, полысьджыкъяс топöдчöмаöсь öта-мöд бердас да ышлолалöны сöмын. Воасны сёрниöн и Опоня горув поскын каститчöмöдз. Шензьöны: мыйся мути пö сэнi дурö, гашкö пö, кузь Опоньыслöн ортыс да. Страсьт!

Пöльö кывзас-кывзас налысь сёрнисö да и шуас, ме пö тöда, кыдзи мынтöдчыны вöв лэдзасьöмсьыд.

- Кыдзи нö? Вай висьтав, бур мортö. Збыль кö тэ верман миянлы отсавны, ставнымлы лоан медбур гöстьöн.

- Колö мегыр улад öшöдны жыннян.

- Эн сöр, - шуö öти мужик, - ме эг нин öти, а кык жыннян нин öшöдлi да мутивöйыс ёнджыка на тешитчывлiс.

Пöльыд малыштас тошсö да читкыртлöмöн шуас мужикыдлы, тэ

пö öд кöрт либö ыргöн жыннян öшöдлiн.

- Дерт жö, - шуö мужикыд, - а кутшöм нö нöшта жынняныс овлö?

- А тэ пуысь, пипуысь вöч жыннянтö да куимысь молитва лыддигмоз кöртав мегырад, сэки и аддзылан.

Эз эскыны мужикъяс, сералiгтырйи шмонитiсны пöльö вылын, эк пö тэ тун, аслад вöлыд бöжтöм, а миянöс велöдны босьтчин. Пöльыд ружöктыштас, чеччас да пырас керкаас. Но, öбöдитчис пö тай пöрысь мортыд. А пöльыд недыр мысти петас бöр, киас кутö жыннян пуысь.

- На, - шуö, - пысавлы мегырад да видлы, збыль эг висьтав, сöмын кöрталiгад куим молитватö эн вунöд лыддьыны.

Мужикъяс виччысьыштiсны пемдöмсö (сёр рыта-войясö пö нöшта на ёнджыка каститчö да). Медся повтöм мужиксö ыззьöдiсны видлыны пу жынняныдлысь вынсö. Доддялiсны корадодьсö. Молитваяс сьылiгмоз кöрталiсны мегырö пу жыннян и мöдöдiсны морттö, ветлы пö бöра-водза ылi грездöдзыс да некутшöм неминучатöг кö бöр воан, миянсянь парта вина.

И ветлiс öд мортыд. Эз лэдзсьысьлы вöлыд ни öтарö мунiгад, ни мöдарö локтiгад. Воас мужикыд – вомыс пельöдзыс, вашъялö. Збыль пö пöльыд висьталöма. Вот пö и дивö! Сэсся вöчалiсны мужикъяс пу жыннянтö да шуркъялöны-ветлöны вöлöн, оз нин сöмын каститчы.

Быд пулöн пö эм аслас торъя вын. Гашкö, и пипу жынняныдлöн сэтшöм аслыссикас вын эм – видзны йöзсö неминучасьыс.

Попов, Г.И. Кыдзи чужö сьыланкыв/ Г.И.Попов. - Сыктывкар. 1999. – С. 37 - 38. – Пер.загл.: Как рождается песня.

Сюр пöлян (берестяная дудка)

Якö Васьлöн да Кирö Матренлöн быдмöны зэв мусаник ныла-пиа. Ок и визулöсь да гажаöсь, бать рöдас мунöмаöсь. Якö Васьыс зэв гажа да шмоньлив морт, мастер, зэв киподтуя. Гудöкнад бура ворсö и. Сэтчö жö и сьылö зэв лöсьыда, уна тöдö сьыланкывъястö. Сиктын öти праздник оз коль Якö Васьлöн сьылöм-ворсöмтöг. Налöн керкадорса ыджыд льöм пу дорын век тырыс йöз праздникъяс дырйиыд. Батьыс да пöльыс Якö Васьлöн зэв гажаöсь вöвлöмаöсь. Сигудöкöн ёна жö гажöдлывлöмаöсь сиктсасö.

Якö Вась сиктын медся колана морт. Сiйö пастук. Видзö мöсъясöс колхозысь, да-й сиктсаяслысь тшöтш. Абу эськö и уна мöскыс, мыйкö сё юр гöгöр и эм, но зэв асныраöсь.

Быд асыв кытшовтны колö пастуклы да чукöртны öтилаö. Кöзяйкаясыс эськö колльöдыштасны мир туй вылöдзыс, да ёна на колö Якö Васьлы коравны, пока öти чукöрö чукöртчасны тайтöясыс. Мöдарö сэсся, гортлань вайöдöмыс сюрукъястö дзикöдз жö бонзьöдлiсны морттö. То вöрö пырасны мöсъясыд тшакла, то ытшкытöм на видзтор вылö вожасясны. Видлiс жö эськö Вась мöсъясöс велöдны быдсяма ногыс, да весьшöрö.

Со и талун бара на грекö вöйис мортыд. Некыдзи оз кöсйыны локны сюра юраясыд гортаныс. А мый налы? Öвад абу петöма, ыркыдкодь. Да и рас пытшкас уна мöсгобыс петöма. Бöж лэптöмаöсь да сöмын и шутёвтiсны-пырисны раскад. Быдса час чöж Якö Вась горзiг-матькигтырйи вöтлалiс мöсъяссö су потшöсланьö. Кыдзкö тай сэсся пыртiс жö ставсö су заборöдыс да вöтлiс найöс сиктланьö.

- Да, мыйкö колö думыштны, тадзи оз артмы, - мöвпалö ас кежас Вась, - вот, эськö, тöдысьöн кö вöлi, эськö нимкыв лыдди, дай ставыс. Эськö тайтöясыд салдатъяс моз кывзысисны. Но кысь тай.

Со и сиктöдз воисны. Кöзяйкаяс виччысьöны, ропкöны кодсюрö Вась вылö: вошин пö, вошин мöсъяснас и сорöн!

Сiйö сöмын вашмунлас да дышиника шмонитö накöд: час пö велöдча тöдысьö, да мöсъясыд пö кутасны бур гöтырысь моз на бурджыка кывзысьны менсьым. Вот пö видзöдланныд. Но пö и бызодей тэ, зептад кывйыдла он пыр небось, век нин мыйкö сöрыштан.

Тадзи варовитiг-щмонитiгтырйи и коллялiс-меститiс пастук видзанторъяссö местаöдзыс. Весиг воис горт дорöдзыс. Налöн керка-картаыс дзик помас, да лöсьыд и эм горт дорсяньыс заводитны уджсö – гортас жö и помалö.

Йöртiс Августа нима мöссö, тайтöсö карта вылас да вомгорулас сьылiг-мургигмоз кайис кильчö вылас. Пуксис кильчöвывса лабич вылас, ышловзис да видзöдлiс гöгöрбок. Быдлаысь тöдчис кöзяинлöн быд киподтуйыс. Потшöсъяс зумыдöсь, джуджыдöсь, дурмöм кöбила оз чеччышт. Пывсян выль на. Мöйму на сiйöс тшуплiс-лэптылiс.жытник бур на жö. Öшинювса трубаысь ваыс медся кос гожöмъяснас оз бырлы. Пöльыс на кодйывлöма трубасö (юкмöссö). Джуджыд, сажень куим кымын лоö, гашкö, и унджык на.Матiгöгöрса суседъясыс ставныс тайö трубаö волывлöны – тшай вала пö. А чöскыд жö и эм ваыс. Кöдзыд, югыд синва кодь дзик. Мед юöны, здоровье вылö.

Батьö, лок, пыр, тшайыд пузьöма, мамö блин пöжалöма-дзожгöма, - торкис Васьлысь мöвпъяссö Сергей пиыс. Сергейыс Васьлöн зэв сюсь да шань детинка быдмö. Регыд и батьлы отсасьысь лоö.

- Но, пыра, пыра. Сöмын мыськышта чужöмöс войтва тыра бöчкасьыс ловъя ванас. Мун пырав, пиук, да вай меным петукъяса вышивайтöм кичышкöдсö.

Вась пöрччис вылыс паськöмсö коскöдзыс да акайтiг-окайтiгтыр мыссис сöстöм ванас. Содз тырöн коялiс чужöмас да морöсас. Мышку вылöдзис на лэпталiс васö. Дерт, гачьясыс кöтасисны жö-а.

- На, батьö, чышкысь, кöтасьöмыд дзикöдз тай, - сералiгмоз матыстчис кичышкöдöн детинкаыс.

Вась босьтiс кичышкöдсö да топыда зырасис-чышкысис сiйöн.

- Но, пиö, пырам. Видлам, кутшöм блин пöжалiс мамукным миян.

Босьтiс писö моздорас да пырис керкаö. Пöсь блинöн сэтöра тшай юöм бöрын Якö Вась пуксис пач дорö чер пу мольöдны, а нывкаыс да пиыс босьтчисны ворсны. Котралiсны-котралiсны, кылö, да лöнисны.

- Мый нö лои, ланьтiнныд сiдзи? – юалiс Вась юрсö лэптывтöг.

- Батюк, Пашукыдлöн сюр нёньыс кок улö веськалiс да потiс, ойя да ойя. Эг и тöдлы вед!

- Но, но, эн няргы, мужик-детина, потiс кö и потiс. Гашкö и бур водзö на. Кад нин Пашуклы вунöдны сюр нёнь йывсьыд. Невеста öд нин. Сiдз öд, Пашук?

Пашук повзьöмакодь да сöмын юрнас и гоньгöдлыштiс.

- Ноко, вайлы татчö, Сергунь, видзöдлам, гашкö, мый вылö кö и туяс на, - босьтiс киас сюр нёньсö да бергöдлыштiс Якö Вась. Вайöдлiс вом дорас да пöльыштiс: кылiс кутшöмкö у-у-х-р-р-р. Сэсся тупкыштiс паськыд Ки пыдöснас да нöшта топыдджыка пöлявны босьтчис. Артмис: у-му-му-му. Нылыс да пиыс синъяссö паськöдöмöн видзöдöны батьыс вылö. Мый пö лоис тайö миян батьыс? А сiйö сöмын и пöлясьö. Юрас чужис зэв аслыссикас мудер мöвп. Чеччис да петiс кильчö вылö. Нöшта сюся видзöдлiс сюр нёнь вылö да довкйöдлыштiс юрсö: «Но, мокасьтö, а öд артмис, буди, видла вöчны!»

И вöчис öд. Сюра нёнь векниладорас сюйис кусыньтöм вöсньыдик сюмöд тор, пыш сунисöн гартлiс сюрсö водзö петöмысь.

Лöсьöдыштiс-малалыштiс гöгöрбок да пöльыштiс. Сэтшöм мичаа артмис, быттьö дзоляник нёньпом тайö бакöстiс. Кывзысьыштiс да нöшта пöльыштiс…

«Му-у-у», - шыасис карта вылас Августа нима мöскыс.

- Мый нö, Васьö, лои, мый мöссö шызьöдiн лысьтiгкостiыс? – юрсö мыччис карта öдзöссьыс Матреныс.

- Ставыс бур, зэв бур, - шуис Вась да паськыда нюммунiс, сьылiгтырйи сэсся пырис керкаас.

Асывнас водз садьмис. Чеччис да тшай пузьöдiс самöварöн, пöлялiгмоз видзöдiс сюр пöляныс вылö да нюмъялiс. Пырис Матреныс мöс лысьтанiнысь.

- Мый нö, Васюк, талун тай вывтi водз чеччöмыд?

- Сысъяв, сысъяв йöвтö. Мöс вöра йöвсö шняпнита-юа да сэсся мöда. Кöсъя видлыны öтитор. Ог на висьтав, гашкö, сералан.

Воис кад чукöртны мöсъясс да колльöдны йирсянiнö. Петiс Вась миртуйö да видзöдлiс гöгöрбок. То öтиласянь, то мöдласянь кутiсны петавны мöсъяс, кывны баксöм шы да бабаяслöн видчöм-ропкöмыс.

- Но, господи, благöслöвит, - шуис Вась да матыстiс сюр пöлянсö вом дорас. «Му-у-у, му-у-у…» - шыасис пöлян, «му-у-у…» - пондiс кывны быдласянь. Мöсъяс юрсö лэптöмöн, котöрöн сорöн чукöртчисны Якö Вась гöгöр да баксiсны. Бабаяс чуймöмöн, вомсö паськöдöмöн видзöдiсны да шензисны. Сё дивö öд и эм да! Якö Вась быдöн повзис, люкаласны пö и быдöн, сюра дявöлъясыд. Но ставыс лои бур. Мöсъясыс регыд öвсисны, öтлаын, разöдчытöг мöдöдчисны пöскöтиналаньö.

Со сэсся тадзи кутiс быд асыв и рыт ворсны пастук тайтöяслы чукöртчан шыяс. А найö велалiсны сюр пöлянöн ворсöмсö да эз и сэсся разiпели котравны мунiг-локтiгмозыс. А колхознича-скöтничаяс вöлi ошйысьöны: йöв пö мöсъяслöн содiс, музыканад йирсигад.

Вот пö тайö и сюрпöлян, вот пö тайö пастук! Вот пö тайö Якö Вась миян!

Попов, Г.И. Кыдзи чужö сьыланкыв/ Г.И.Попов. - Сыктывкар. 1999. – С. 38 - 40. – Пер.загл.: Как рождается песня.

Тарган да тутш-тотш (колотушка)

Шабдi-сöдз юрсиа Генюклы ыджыд мамыс рытсяньыс на шуис-висьталiс, аски пö лысва косьмöм бöрас ветлам керöс дорö. Оз

пö кисьмöма, ок пö уна да гырысь. Мича да чöскыд пö озсö таво Енмыс сетöма.

Генюклöн нимкодьыс! Водз и водiс, мед аскиыс öдйöнджык воас. Узис чöскыда. Асывнас садьмис Петрöван нима петуксьыс водзджык. Мамыс шуö, мый нö пö, дитя, вöталiн, вомтö пö тай зэв чöскыда вöлi тяпкöдан ун йывсьыд? Генюк нюмдiс да, оз пö, шуö, быттьö вота да сёя! Ок и чöскыд. Ки тырöн быттьö вомö апала.

Пырис мöс лысьтанiнысь ыджыд мамыс: но, шуö, шань пиыс тай чеччöма нин, чöвлы, шуö, сысъялышта да мöс вöра йöвсö пöсь шаньганас сёйышт-юышт.

Генюк мыськыштiс чужöмсö, чышкысис мичаа вышивайтöм кичышкöдö да пуксис пызан сайö.

- Ыджыд мам, озтö вотнытö Мишö другöс тшöтш нуöдлам, Аннук чойсö сылысь да. Но öд?

- Но, но пиук, нуöдлам, ставнымлы тырмас. Вот сöмын мед шондiыс вылöджык кыпöдчас и мöдöдчам. Бура ылын öд. Пока воам, лысваыд и косьмас.

- Ме ассьым чуманöс, батьö тай вöчис, босьта, но?

- Босьт, босьт, кага. Вермам кö, унджык вотам. Локтам да варенньö пуам нимлун кежлад.

Мöс вöра йöлöн да пöсь шаньгаясöн нуръясьыштöм бöрын регыд и мöдöдчискы озъя керöс дорö. Мунiгмозыс кежалiсны сикт помланьыс сулалысь важиник керка дорö, нуöдiсны тшöтш оз вотны Генюклысь другсö – Мишукöс да сылысь чойсö – Аннукöс. Налöн радыд! Мишуклöн да Аннуклöн мамыслы тшöтш нимкодь лои.

- Ветласны, ветласны мед, Парась тьöт, мед велöдчасны дзолясянь вöлöга перйыны.

Дерт эськö, Парась абу сылы некутшöм тьöтка, но ставыс сиктсаыс шуöны тадзи, Парась тьöтка пö. Шань да быдöнлы мелi кыв аддзысь нывбабаыд öд тай ставныслы бур тьöтка кодь.

Челядь котралöны-ризъялöны, быттьö дзоляник кöза пиян. Радыд налöн.со тай, водзвылын котöртöны, серам, гаж.

- Сё майбырöй дай челядьдырöй, - ышловзис Парась тьöтка, - ставыс мойдын кодь.

Матыстчисны тёльгана шор дорö. Ок и визув тайö шорыс, сöмын и тёльгö-ворсöдчö ваыс, эзысьöн югъялö. Дерт бара-й тайö шор йывсьыс и эм сiйö мича сьыланкывйыс, кöнi тай сьывсьö:

Висьтав меным эзысь шор,

Котöртнытö мудзан кор?

Тёльган-больган лун и вой,

Сьылö тэнад дзик быд войт.

Дзик сэтшöм и эм тайö шорыс. Дзик быд войт со тёльгö сылöн.

Парась тьöткалöн шор дорö вотöдз челядь удитiсны гоз-мöдысь чеччыштны шор вомöныс öтарö-мöдарö.

- Ыджыд мам, видзöд, шорыс кутшöм мича! Кутшöм лöсьыда тёльгö-визувтö, быттьö сьылö гажа сьыланкыв, - ыджыд мамыслы воча котöртiс Генюк.

- Да, дитя, сьылö-ворсö шорыс, сiдзи и нимтöмаöсь сiйöс, тёльгана шорöн.

Сувтöмöн кывзыштiсны тёльгöм-дзольгöмсö шорыслысь. Друг сэсся керöс бокладорсяньыс кылiс: ку-ку, ку-ку…

- Кöк, кöк. Кöк кöкö, - горöдiс Аннук да зэв збыльысь юалiс кöклысь: - Кöкиньöй, чойиньöй, узь да вöтась, да висьтав, кымын во ме ола?

Кöкинь ланьтыштлiс, быттьö унмовсьлiс да вöталiс Аннукöс, а сэсся пондiс лыддьöдлыны:

- Ку-ку, ку-ку, ку-ку…

- öти, кык, куим, нёль…- лов шынысö дзебöмöн лыддьöны челядь. А кöк сöмын и лыддьö. Гашкö сёысь на унджык во висьталiс кöкинь овны Аннуклы. Нимкодьыс сылöн. Вомыс пельöдзыс. А со и керöс бок нин тыдовтчис.

- Тотш-тотш, тотш-тотш-тотш, тотш-тотш….- кутiс кывны вöрас. Тайö сизь тотшкöдчö, пучöйясöс корсьö. Зэв бур тайö лэбачыс, пуяссö лечитö. Да и аслыс кынöмпöт перйö.сöмын и сизьдö со, тутш да тотш висьталö. Кыдзи сöмын юрыс оз пыркав коньöрлöн. А тонö, со пу вылас, катшаяс китшкöны, мыйкö тыдалö абу юкöмаöсь, быттьö пинясьöны öта-мöдныскöд. Вöрыс олö аслас олöмöн. Быдсяма олысьясыс сэнi эм. Быдсяма шысö кылан, кывзысьыштан кö. Со кöнкö пыдын шутьлялöм кылö, мöдлаын тюрзöм, а то друг таргöм шы кылас.

Воисны керöс бокöдз. А озйыс мыйта! Гöрд ковёр быттьö вольсыштöма-дöввидзö. Ёна и вотчисны. Ставныслöн дозныс тыри. А сынöдсö кöть апав, сэтшöм чöскыд кöрöн öвтö, юрыд бергöдчö. Луныс мича, шондiа, кыдз шуласны, «вый войталö».

- Сё майбырöй да-й олöмöй, - ышловзис Парась тьöтка да веськöдiс пöрысь коссö.

- Генюк, Аннук, Мишук, - чукöстiс челядьöс, - мунамöй сэсся, дитюкъяс, тырмас. Весавны на ковмас озтö.

…Рытнас, озъя варенньööн тшай юöм бöрын, челядь бара на

öтлаö чукöртчисны ворсны. Быдторсьыс ворсiсны. И дас чагйысь, и сарысь, и дзебсясьöмысь. Сэсся пуксисны Генюкъяслöн звöз вылö да ёна и варовитiсны оз вотöм йылысь. Кутшöм шыяс кывлiсны, мый аддзылiсны.

- Аннук, ноко, кöкиньыд кыдзи кöкис, кымын во висьталiс тэныд овны? – юалiс Генюк.

- Ку-ку, ку-ку! – нимкодя сьылыштiс Аннук, - кöкиньыд öд менö любитö, сёысь на, гашкö, унджык во висьталiс. Вот!

- А сизьыд тай тотшкöдiс-сизьдiс пуас, сöмын и тутш да тотш кылö, да öд? – сюйсис сёрниö Мишук.

- А катшаясыд кыдзи кужöны китшкынытö гöлöснысö вежлалöмöн, быттьö пиньö воöмаöсь.

- Вöрас кымын пöлöс шы вöлi кылö. Уна зверь-пöтка сэнi олö. Кодi таргö, кодi тювзö, а кодi равзö.Öта-мöдсö бара гöгöрвоöны оз-а?

- Дерт оз, кöкиньыд тай гöгöрвоис менö, - нюмыртлiс вомсö Аннук.

- Гашкö, и гöгöрвоöны жö мукöдыс, - сöгласитчис мукöдыскöд Мишук.

Ёна на сёрнитiсны челядь звöз вылын пукалiгмоз, кад йывсьыс весиг вунöдiсны. Мишуклöн да Аннуклöн мамыс корсьны локтiс.

- Локтöй нин, узян кад нин воис, а тi век на шöйтанныд, энö на пöтöй лунтырнас?

Мишук да Аннук жугыльмисны быдöн, но чеччисны жö да котöртiсны мамыс бöрся. Генюк пырис жö сэсся гортас. Водiс да дыр на эз узь. Пыр на быттьö кылiсны вöрса шыясыс, шорлöн тёльгöм-ворсöмыс.

Попов, Г.И. Кыдзи чужö сьыланкыв/ Г.И.Попов. - Сыктывкар. 1999. – С. 45 - 47. – Пер.загл.: Как рождается песня.

Кöкö, дзольган да мукöд ворсанторъяс (берестяная дудка и другие инструменты)

Сё майбырöй дай муса шоныд гожöмöй! Мыйла нö тэ сы öдйö котöртан? Эз на удитны челядь пöттöдзыс купайтчыны-гожйöдчыны, эз на удитны пöрысь пöль-пöч кöдзалыштöм нин лы-сьöмнысö шонтыштны, а со нин Илля лун матыстчис. Илля лунö пöлянъясöн чуксасьöны-чипсасьöны. Илля-великöй пö ачыс сюр-пöлянöн тутсывлöма. Тайö луннас ва пö изъялöма. Талунсянь сэсся, Илля лунсяньыс, оз нин купайтчыны ва дорын, кöдзалö ваыс…

Челядь чукöр лэччисны ыб улö ю дорас ворсны. А сэнi нюкыс кодь эм да уна пöлян гумм быдмö, Навöлöк шорланяс. Детинкаяс перъялiсны гумъяссö да öдйö и вöчалiсны быдсяма пöлöс

пöлянъяссö, аслыныс и нывкаяслы. Кодлöн кутшöм артмис: тутсансö и чипсансö, тюрзансö и буксансö. А Мишук со каля-пöлян вöчöма. Зэв лöсьыд, небыд шыа. Пöлянысь пöлясьöны-тутсöны, сералöны- ворсöны. Гажа…

öнись дядь лэччылöма жö ю дорö. Кайигмозыс сувтiс челядь чукöр дорö да кывзыштiс налысь тутсöм-ворсöмсö. Челядь аддзисны да öдйö и кытшалiсны öнись дядьöс. Сöмын и дзольгöны-висьталöны мыйкö, ошйысьöны пöлянъяснас. Öнись дядь ошкыштiс найöс да видлалыштiс пöлянъяссö. Öтиöн ворсыштiс, мöдöн. Велöдыштiс, кыдз бурджыка на нöшта вöчны пöлянъяссö, медым ворсiсны гораджыка да мичаджыка.

- Со, - шуö, - босьтам кö кык пöлян да тутöстам öтинас, а сэсся мöднас – артмас кöклöн кöкöмыс. А унджык пöлян кö öтлаöдам, позяс и «Шондiбан» ворсны.

- Да, муса пиянö, ме öд коркö тiян кодь жö вöлi, зэв визув да вильыш детинкаöн, - вшловзис öнись дядь да пуксис ыджыд ваöн на вайлöм кер пом вылö.- Ёна жö важöн ми ворслiм быдторнас. Уна ворсанторъяс вöчавлi и ме. Босьта вöлi сюмöд киль, пукта вом дорö да чипсася-ворса. Быттьö колипкай сьылö. Весигтö каньяс вöлi ылавлöны. Кыйöдчöны-локтöны куткы, а сэнi ме. Этша и серавлiм.

А öтчыд мамö вöлi печкö, а ме ворса канькöд джоджын. Котралiгад миян мамлöн тупыль тыра чуманыс уси джоджö да киссис. А сэнi вöлöма вит-ö-квайт чöрс. Вурун шöрт тупыльяссö öдйö бöр пукталi чуманас, мед кань оз раззяв да дзуг, а чöрсъяснас босьтчи ворсны. Пуш сунис торъясöн кöртавлi чöрс помъясöдыс да кутi кыскавны джоджöдыс, а кань вöтлысьö, куталö. Сэсся лэптi джоджсьыс да кутi легöдны. А чöрсъясыс öта-мöд дорас инмалöны да зэв лöсьыд шы артмö. Кажитчис да нöшта на ворсыштi.

- Мамö, мамö, - шуа, - кывзышт, кутшöм лöсьыд шыыс. Дзик быттьö тёльгана шорыд визувтö. Со, дзольгö-ворсöдчö изъяс вывтiыс, вужляяс увтiыс.

Мамö кывзыштiс да шуö: «Сiдз и эм, дитя, дзик быттьöшорыс визувтö-сёльгö».

Вот, шань челядь, тадзи и артмалiсны коми йöз костын ворсанторъясыд. Тадзи жö и сьыланкывъясыд артмисны. Быд сьылöм- ворсöмын кылöны чужан мулöн, вöр-валöн, зверь-пöткалöн

шыясыс, гöлöсъясыс. Велöдчöй кывны найöс, радейтöй чужан мутö рöднöй мамтö моз, видзöй сiйöс, сылысь мичлунсö да сöстöмлунсö. Мед и тiян челядьлöн на челядьыс любуйтчасны Енмöн сетöм мичлуннас!

Попов, Г.И. Кыдзи чужö сьыланкыв/ Г.И.Попов. - Сыктывкар. 1999. – С. 47. – Пер.загл.: Как рождается песня.

..к началу раздела

---

© Нившерский филиал им. Ф.Ф. Павленкова МУ «Корткеросская ЦБС» 2010 Республика Коми, Корткеросский район, с. Нившера,м. Дiвыв, д.728 E-mail: lebedevlib@mail.ru ( 8-(82136) -9 – 83 – 93, 8-(82136) 9 – 98 -16