ЧИВИЛЬТÖМ
Одыбсалöн Рöштво дырйи гажöдчöмъяс
Кык юкöн пьеса.
Лöсьöдысь:
Геннадий Иванович Попов,
музыка велöдысь
(Кöрткерöс районса Нившера сикт).
Ок и гажöдчывлöмаöсъ
важöн Рöштво дырйиыд миян Одыб сиктад. Куим лун вöлöм
гажöдчöны - чивильтöны. Чивильтöм (гашкö,
чибильтöм) кывйыс кыдзи да мыйысь артмöма - некод оз тöд.
Олöма пöчöяс тай шуöны, гашкö пö,
кутшöмö лэбачьяслöн сьылöмыс ли мый ли. Мукöд кайыс
пö тай сiдзи и сьылö: чив-чивиль, чив-чивилъ. Сiдзи жö со и
чивилътöны - сьылöны вöлöм. Лэбачъяс кельöб моз
жö, чукöрöн. Öтув гажöдчöны. Чукöртчасны
сьывны-йöктыны да гажöдчыны радейтысь ныв-зон, вöзйысясны
шаньджык, ыджыдджык керкаа пöль-пöч ордö да гажöдчасны
сьöлöм бурмымöныс.
Вай жö косавламöй кад пытшкöдыс бöрö, ыджыд войнаöдзса на олöмас, да видзöдламöй Одыбса том войтырлысь Рöштво дырся гажöдчöмъяссö. Накöд öтув чивильтамöй.
Ворсысьяс:
Öнись дядь – олöма нин пöльö, зэв гажа морт;
Парась тьöтка - сылöн гöтыр, тшöтшъякодь верöсыскöд, шань öбичаа пöчö;
Матьвей Грапö - том ныв-зон чукöрлöн нырщик, гаж панысь, лöсьыд мыгöра ныв;
Сандра, Тате, Катьö - гажöдчыны радейтысь том нывъяс;
Митрöпан - укшаль, латшкöс тушаа зон;
Микулай - шмонитны радейтысь, тошсялöм нин зон;
Сергей, Öньö - бурлак-зонъяс, жöникпуяс;
Славитысьяс - пöрысь пöчöяс;
Том ныв-зон, чивильтысьяс.
Медваддза юкöн
Гажöдчöмыс мунö Öнись
дядь ордын. Öнись дядьлöн керкаыс кöть и ыджыдкодь, но керка
пытшкöсыс гöлиник. Но Öнись дядь да Парась тьöтка зэв киподтуяöсь
да видзтысьöсь и весигтö со занавес пач бокас
öшöдöмаöсь. Занавес сайын тыдыштö сöмын пачвом
дорыс, ва пельса да залавка. Залавка весьтас тувъялöма тасьтi видзан,
кöнi пукталöма пу тасьтiяс да ыджыд пу дар. Пызан, лабич да ас
вöчöм кык улöс. Енув пельöсын öбразъяс. Лабич улас
тыдалö гын сапöг вöчан кöлуй, лöсалöм, но
мольöдтöм на чер пу.
Пачводз дорын ноксьö Парась тьöтка. Пызан сайын лабич вылын пукалö Öнись дядь, зуöн сыналö тошсö. Ышловзьö да пуктö зусö джаджйö.
Öнись дядь (видзöдлö öшиньöд, сэсся пöчöлань). Но, югдöма нин тай ывлаыс (малыштö тошсö). Вай, пöчук, нуръясьыштам, мый Ен сетас. Артмöма тай, тыдалö, няньыд талун, Кристос ним кузя (исалыштö сынöдсö пачводзланьыс). Со öд кутшöм чöскыд рудзöг нянь дукыс. А-ак!
Парась тьöтка (пукталö местаö укват, нянь зыр). Артмис, артмис. Слабог. Сюшлап кындзи картупеля шаньга на пöжалыштi дай (вайö нянь пöв вылын пöжасъяс). На, сёй пöсь няньсö, молитвасö сьыв да.
Öнись дядь (сувтö Ен öбразъяс водзö да пернапас чöвталiгмоз сьылö «Отче наш», сэсся чегö нянь да сюйö вомас. Сёйö да ошкö). Сё майбырöй, пöсь няньöй!
Парась тьöтка (вайö гырничын льöмъя ляз да яндöваын тагъя сур). Но, славитыштам господьöс, пасйыштам праздниксö. (пуктö лязсö пызан вылö, а сур яндöвасö сетö пöльлы). Кöтöдышт вомтö, Öнисимушко.
Öнись дядь (видзöдлö öбразъясланъ, шуалö). Рождество твоё, Христе боже наш, воссияй мират и сьвет разума... (юö яндöваысь. Чышкыштö кинас ус-тошсö да сетö яндöвасö пöчлы).
Парась тьöтка (пернапасасьö öбразъяс вылö, шуалö). Слава отцу и сыну и святому духу (юö да пуктö яндöвасö пызан вылö).
Öнись дядь (видзöдлö куш яндöвасö). Аминь.
Парась тьöтка (матыстö ляз гырничсö). Льöмъя лязсö видлы пöлюк. Зэв жö чöскыд артмис талун.
Öнись дядь (видзöдлö пызан вылö). Паньястö тай нö абу вайöмыд! Чуньöн öд ог чуняв.
Парась тьöтка. Ок, выжывыд, паньтöгыд верда (чеччылö да вайö пу паньяс). Нинöм нин юрöй оз уджав, пыр мыйкö вунöма.
Öнись дядь (чöскыда тяпкöдчигмоз панясьö). Вунö, дерт (индö яндöва вылö). Со и яндöватö тыртны пыр жö вунöдан.
Парась тьöтка: Тырмылас. Асывсяньыс öд он жö коддзöдчы. Регыд öд и чивильтысьясыд воасны.
Öнись дядь: Налöн бара-й оз узьсьы, мокасьтъяслöн. Тöрыт эськö вель сёрöдз олiсны-гажöдчисны да.
Парась тьöтка: Мед. Дивъя. Мед гажöдчасны. Талун öд оз куш киöн локны. Вай идрышта пызан вывсö да залавка вывсьыс ыджыдджык нянь кудсö вая. Мед тöрас вайöм пирог - шаньгаыс (чеччö да идралö пызан вывсьыс. Вайö да пуктö пызан шöрö ыджыд нянь куд).
Öнись дядь. Me öд нинöм тай oг шу. Me öд и ачым на тшöтш гажöдчышта.
Парась тьöтка. Да. Тэ нöшта пет эстчö. Кок уланыс гартчыны да менсьым синмöс вежны. (Кылöны гажа гöлöсъяс). Со, воалöны нин тай. Мун, пуксьы эстчö, пачводз дорас. Эн мущайтчы кöть пыриганыс.
Öнись дядь чеччö да мунö пачводз дорö.
Воссьö öдзöс да ватагаöн пырöны ныв-зон.
Быдöнлöн киясаныс нянь пöжасъяс. Унджыкыслöн пирог да
шаньга. Ныв-зон чукöр сувтöны джодж шöрö, копыртчылöны
пызан дорын лабичын пукалысь кöзяйкалы да пачводз дорын пукалысь
кöзяинлы. Медводдзаын Матьвей Грапö.
Матьвей Грапö (мичаа лывкöйдлöмöн шуалö). Кöзяинлы да кöзяйкалы муöдз копыр (мичаа копыртчывлö нöшта). Мед лоанныд шаньöн - локтiм ми няньöн. Тöрыт лэдзинныд гажöдчыны кушöн - талун лэдзöй пирöгöн да шаньгаöн. А аски кö нöшта лэдзланныд, и кык пирöгöн да шаньгаöн ваям.
Парась тьöтка (чеччö).
Локтöй, локтöй. Пукталöй
пирöг-шаньганытö нянь кудъяс да пöрччысьöй.
Паськöмъястö паччöр дорас пукталöй дай, озджык гандайтчы.
Ныв-зон зiля пукталöны
вайöмторнысö да пöрччысьöны. Паськöмнысö
пукталöны да сувтöны джодж шöрö ки на ки кутчысялöмöн.
Йöктышталiгмоз кытшöн мунiгмоз сьылöны
«Чивильтöмлысъ» медшöр съыланкывсö. Матьвей Грапö
босьталö.
Чивиль - воробей
Чивиль, чивиль, чивиль - воробей,
Исповодился на ноги,
Исповодился
на спине.
Туды-сюды прошла, туды прими прошла
Примолоденька. Ещö жöник тотара,
Тотара ли понтара,
Еще семь четверду, четверду ли шестою.
Заплетой,
заплетой,
Запивайся труба. Середи отеча.
Потом при свая и медок,
Сё медок, сё медок.
Сё во потом пил.
Сё во есь воса кöрные,
Новопите медорные.
Загур девица, иза чистом поле,
Не гусер и не гуня,
Не велик и не лета.
Коди, гусли домой,
Коди, Сергей, домой.
Я сама гусь-лиса,
Сама
Серёжа.
Тайö сьылiгöн йöктiгмозыс
гартчылöны и разсъылöны. Гартчигас сьылöны «Заплетойсо...» и
сьылöны быдöнлы, кодi гартчыштас. А разьсиганыс сьылöны «Загур
девицасö...» - кытчöдз ставные оз разьсьыны да бöр лоö
кытш.
Митрöпан (шензьöмöн). Вот тайö миян и сьыланкыв. Нинöм ог гöгöрво, мый йылысь сьылам. Этiя Сергей йывсьыс, гашкö, да (uндö Сергей вылö).
Сергей (ырыштчылö).
Бöлбан тэ! Митрöпан -
турлöпан. Мун вай, вош! Эн вуджрась тан... Me
йылысь пö. Хы-ы. Кылан öд, сьылöны: сё во потом пил, а ме вом
дорö на эг босьтлы курыд ватö.
Матьвей Грапö (кыскыштö Сергейöс сойöдыс). Но, кутiн сэтöнi. Сьыланкыв - сьыланкыв и эм, зэв на-й лöсьыд. Кыдзи пöчьяс, ыджыд мамъяс сьывлöмаöсь, сiдзи и ми сьылам. Зэв гажа сьыланкыв.
Тате (сувтö
Сергейлы паныд). Вайö водзö
гажöдчамöй (Сepгейлы мичаа
копыртчывлöмöн босьтö съывны да бöрыньтчигмоз,
топайтöмöн, йöктыны. Сергей сiдз жö топайтiгмоз -
йöктiгтыр мунö Тате борся).
Изу лесу
Изу
лесу, изу лесу,
Изу
лесу перелесу,
Изу лесу перелесу.
Перелесу, перелесу,
Перелесу летит гöлуб,
Перелесу
летит гöлуб.
Летит
гöлуб, летит гöлуб,
Летит
гöлуб, сизöй гöлуб,
Летит гöлуб, сизöй гöлуб.
Сизöй гöлуб, сизöй гöлуб,
Сизöй гöлуб - нека веска,
Сизöй
гöлуб - нека веска.
Нека
веска, нека веска,
Нека
веска пронявеска,
Нека веска пронявеска.
Пронявеска, пронявеска,
Пронявеска вещегладу,
Пронявеска
вещеглазку.
Вещеглазку,
вещеглазку,
Вещеглазку
война вели,
Вещеглазку война вели.
Война вели, война вели,
Война вели - колопели,
Война пели - колопели.
Колопели, колопели,
Колопели бокинвали,
Колопели бокинвали.
Бокинвали, бокинвали,
Бокинвали посводз народ,
Бокинвали
посводз народ.
Посводз
народ, посводз народ,
Посводз
народ покодили,
Посводз народ покодили.
Покодили, покодили,
Покодили, подводили,
Подводили,
подводили.
Подводили,
подводили,
Подводили
- ладушки-и-и.
Тайöс сьылiг-йöктiгтырйи
Öнись дядь тшöтш сувтö кытшö да йöктö. Эштöм
бöрас ставные пуксялöны
лабичьясö. Koдi оз тöр, (зонъяс)
лажыньтчöны пач бокö.
Öнись дядь (пöсьсö плеш вывсьыс чышкалiгмоз). Аттö и молодечьяс жö. Менö, сирöд мырйöс, чеччöдiнныд. Мокасьтъяс! Мудзмöн лои!
Матьвей Грапö (Öнись дядьлы). Чöв, Öнись дядь, тэ любöй том молодечöс на тасма костад сюян - он ружöктыв. Он на кольччы том зонъясысь ни йöктöмын ни уджын.
Парась тьöтка (öвтыштö кинас). Чöв, Грапö, сöран нинöм абусö. Медбöръя лыаыс нин киссьö руш мешöксьыс.
Микулай (виччысътöг сувтö да локтö джодж шöрланьö. Быттьö зэв сюся мыйкö корсьö). Танi абу... танi абу жö...
Матьвей Грапö. Мый нö, Микулай, воштiн, тöрытья лунсö али мый?!
Микулай (зэв
збыльысь). Ме эськö нинöм на эг вошты да. Öнись дядьлысь
киссьöм лыасö кöсъя видзöдлыны, мед тöдны, кутшöм
сiйö миян, мужикъяслöн лыаыс.
Ставныс
чуймыштлöны быттьö, сэсся гу-узь - серöктöны гажаа.
Матьвей Грапö. Но и бызöдей жö тэ, Микулай. Мун вай, эн неминуйт. Бурджык ворсам ли мый ли.
Микулай (мунö да пуксьö лабич помö). Ворсам кö и ворсам. А мыйысь?
Чеччö нывъяс пиысь медся томыс – Сандра
Сандра (гажаа).
А «гыр юрысь» вай ворсамöй.
Матьвей Грапö. «Гыр юрысь» ко и «гыр юрысь»! Кодi пудъялас?
Унаöн горöдöны. Me, ме, ме...
Матвей Грапö (нерö). Ме, ме, ме... Энö ставныд, тi öд абу ыжъяс. Сандра мед и пудъялас.
Сандра. Пудъяла бара-й (быдöнлы тувкнитлöмöн гажаа пудъялö).
Атö
- катö, кимö лёльö,
Чибö
- чойö, руйö райö,
Калим
будь весь вом,
Дöлг
- гöлк, кись - лоп,
Паччöр зудöс!
Со тай кодi лои «гыр юрыд» (индö Митрöпан выло). Лок, Митропанушкоöй, гыр юрав. Да, чеччы, чеччы, эн öд на вужъясь лабичас.
Митрöпан (дышпырысъ чеччö). Ме, дерт. Пыр меным сiдзи везитö, то «гыр юр», то «нöш юр». Екуняваня!
Матьвей Грапö (пуктö джодж шöрö улöс). Лок, лок пуксьы, эн ерепенитчы (пуксъöдö Митрöпанöс да малыштö юрöдыс): Сюсьджыкöн ло, а то лунтыр ковмас «гыр юравныд» (пöрччö юрсъыс чышъянсö да кöрталö Митрöпанлысь синъяссö).
Босьтчöны гажаа ворсны. Öти волас
- тувкнитас «гыр юрлы», мод. Тувкнитöм бöрас зiля бöр
пуксьöны места выланыс, а «гыр юр» кыпöдлö синъяс вывсьыс
чышъянсö да пукалысьяс вылö сюся видзöдöмöн
тöдмалö, кодi волiс да тувкнитiс сылы. А ставныс нöшта на и
юалöны öтвылысьмоз: «Гыр юр, кодi волiс?» - «Гыр юр кö
тöдас тувкнитысьсö, найö вежсьöны местананыс, а оз кö,
бöр ачыс кольö «гыр юрöн». Тадзи ворсöны
Митрöпанкöд кыкысь. Öтчыдсö оз тöд кодi тувкнитiс, да
петук моз тшöктiсны «ку-ка-ре-ку» горзыны. Митрöпан зэв тешкодя
сьылышiс: «Ке-ке-люль-лю-у-у!». Мöдысьсö тувкнитö Микулай.
Митрöпан тöдö сiйöс, сувтöмöн видлалö -
малалö гöгöрбок да.
Митрöпан (Микулайлы). А-а! Ме вылын раксiн - серавлiн. Öнi сэсся и гыръюрав, Микулай - кая яй!
Микулай (пуксъö сы местаö). Гыр юралöмсьыд öд чад оз босьт ни коскад оз сюй. А нимтысьысь - нерсьысьяслы пö кывъяс нерöд лэдзö. (Грапелы) Кöртав Глапирушка, чöскыд дука чышъяннад!
Матьвей Грапö (пыркнитчö). Хы! Сöр сэсся сэнi. Колскöбта кö тöштшö юрад!
Öнись дядь. А пиö, чышъяннад, абу-й «гыр юр» кодь. Пöтшва ни перед! (чеччö да вайö зааовка пыдöсавтöм увсъыс на ыджыд сюмöд туис кöрыш). Налöй, тайöн ворсöй, тöрас кö юраныд.
Митрöпан. А-ха-ха!
Но, Микул другöй, öні дзик нин «гыр юр» лоин. Тэнад нöш юр серти
и вöчöма, быттьö, Öнись дядьыд.
Микулай. Эн гöрдлы, ужö пöран.
Катьö (гусъöникöн
матыстчö да гöлöссö вежöмысь тувкнитö «гыр
юрас»). Тук, тук, тук! (Зэв
öдйö котöртö да пуксъö лабичö).
Ставöн юалöны. «Гыр юр, коді воліс?»
Микулай (чеччö да корсъö кияснас тувкнитысъöс). Э-э! Эз ков пышйыны, малышті кö эськö - дзик пыр тöді да. Да ме и сідз тöда (пöрччö «гыр юрсö»). Катьö тайö, коді сэсся ме дінö волас?! (Гажаа серöктö).
Катьö (векыштчылö). Колантор тай (чеччö да йöктыштігмоз сьылö):
Дай,
дай, сваття,
Кумы
кöрöбейка,
Кöза
пöскöтина,
Рöгö
излöмилö.
Сьылі
кольчатые,
Сьылі
золотые,
Перина
пукöвöй,
Пöдушка
шöлкöвöй.
Сыръяночка
сыр, сыр,
Сапъяночка
сап,сап.
Это
ли добра,
Это ли шапка.
Нами
- нами подати,
Талати
да волоти,
На
кабаки пойду-у-у...
Тайöс сьылігмозыс, Катьö, йöкгтігтырйи пыр кытшовтö Микулай гöгöр.
Микулай (шензъöмöн). Катьö! Тайö нин сьыланкывсö кытысь кыпöдін? Тэ кодь жö гöгöрвотöм.
Öньö (килькнитö- серöктö). Хи-хи! Мый нö тан гöгöрвотöмыс? Парта вина купили, пуксисны да выпили! Ставыс ладнö лои. Сідз öд, Катюк?!
Микулай (дöзмöмöн). Тэнö, Öнько, оз юавны, сідзкö эн и сырмы син водзын.
Татö (чеччö да зымкнитö кокнас). Вайö частушкаяс сьылыштамöй! Öнись дядь, паськöдлы вай гудöктö. Али нö оз нин ворс гудöкыд?
Öнись дядь. Часлы нö. Важиник нин эськö гудöкöй да. Богословысь на вайлі. Гашкö, ворсас на. (Босътö гудöксö да пуксъö пызан дор лабич помö. Малыштö тошсö да улö - вылö котöртö чунъяснас кизъяс кузя).
Парась тьöтка. Öнисим, босьтчин кö нин, гажаджыка ворс. Эн пыр ассьыд «гачтöм олöмтö» моз.
Öнись дядь (тшапа). Мый нö, «гачтöм олöмыс», зэв на нöшта и лöсьыд!
Микулай (сералö). «Гачтöм олöмтö» кыкöн ворсöй муса пöчукыдкöд, а миянлы гажаджыктор ворс. Вай «Шондібантö» сяркнит!
Öнись дядь: «Шондібан» кö и «Шондібан».
Öнись дядь гажаа ворсö, а нывъяс öта-мöд бöрсяыс гудöкасьысь дорö матыстчылігмоз сьылöны гажаа частушкаяс:
...Каньöс
доддяла пу доддьö,
Тöрöканöс
- рöзвальö.
Сэтчö
милöйöс пуксьöда,
Нуа выставка вылö.
Айка тыла, айка тыла,
Истöг тувъя деревня.
Вайöй меным ероплансö,
Тист
гöрасö кытшовта.
Гудöкасьысьöс радейтлі -
Уна кадриль йöктывлі
Гудöкасьысь
сайö муні –
Уна синва коявлі...
Öньö (чеччö да матыстчö Öнись дядъ дорö). Öнись дядь, вай кадрильтö ворсышт сэсся. Кок пыдöсъяс дзикöдз луддзисны.
Парась тьöтка. Сöмын энö жö вывті зымгöй. Пачöй мед оз жö киссьы.
Öньö (копыртчывлö Матъвей Грапалы). Глаприа, талун мекöд йöктам?!
Матьвей Грапö (мичаа гогнитö юрнас да кутчысъö Öнъöлы киас). Йöктам бар-й. Сöмын эн жö лэбзьöд дзикöдз, бергалігъясын.
Сергей, Микулай да Митрöпан öнъö моз жö копыртчылöмöн корöны нывъясöс йöктыны. Сувтöны параясöн да гажаа укайтіг - акайтігмоз йöктöны «кадриль». Öнись дядъ ворсігмозыс тшöтш кокъяснас зымгö - йöктö. Шыладлöн (музыкалöн) быд вежсъöм водзын горöдö мöд йöктан шыладыслысь нимсö. Сöмын и кылö: «Камаринскöй»... «Чижик»... «пыр пышйöм»...
Пукалысъяс кекöначасъöны кинаныс, шöпкöдчöны да сералöны. Ышöданаа горöдлывлöны.
Кадриль бöрын ставныс чöв пуксьывлöны. Петö джодж шöрö Татьö.
Татьö. Но, немöй чужис али мый? Коді мекöд «Оль кузя лэччö» сьылас?
Катьö да Сандра (öттшöтш, матыстчöны йöктыштігмоз). Сьылам. Босьтав, пöдруга!
Гажаа, йöктыштöмöн, öта-мöд бöрсянъыс кытшовтігмоз сьылöны. Оль кузя лэччö. (Коми народные песни. Сыктывкар, 1993.1том. 149л.б.)
Оль
кузя лэччö,
Керöс
кузя кайö.
Код
керöс ж кайö?
Öгаш
керöс кайö.
Куим
ягöд аддзылін?
Меным
ягöд оз ко-о,
Меным
Карлам колö,
Дивö
колö, диво колö!
Сьöлöм
чеччö, колö,
Сьöлöм
потö, колö,
Сытöг
оз позь лун овны,
Сытöг
оз позь вой узьны-ы.
Съылöм бöрас копыртчылöны пукалысъяслы. Зонъяс мыйкö öта-мöдныскöд шöпкöдчöны-вашъялöны. Öнись дядъ да Парась тьöтка мыйкö вомгоруланыс мургыштöны сьыланногыс моз.
Сандра (ыззъöмöн). Нывъяс, вайö Грапеöс сьыламöй, кытшö сувтам, Грапушöс шöрас босьтам.
Сувтöны кытшö. Грапеöс босьтöны шöрас. Сьылöны места выланыс йöкталыштігмоз да гажа клопайтігтыр:
Стук - стук, воротись,
Пущик Паладь,
Грин ку капуста,
Низь ку невеста.
Кодöс жö сетöны?
Грапеöс сетöны.
Пасибö али абу? (юалöны зонъяслысъ),
Пасибö! (горöдöны зонъяс).
Нывъяс водзö сьылöны:
Сідзкö - Сивöй вöлöн,
Лöз гынъя доддьöн,
Пухöвöй вольпасьöн,
Пухöвöй юрлöсöн,
Кузь гöна эшкынöн.
Ыж да мöс, пась да дукöс,
Лайкъя коска кöръяс;
Ёсь ныра чуши,
Тшöтшыд ныра башмачок.
Чуши да лапи,
Лапи да гöрд чышъян,
Гöрд чышъян да сьöд чышъян,
Алöй платок, да гумажнöй платок,
Бархатнöй
платок, да-й бура пукалö-ö!
Зонъяс (тшöтшмоз). Бур гöтырпу тай, вежалана!
Татьö (йöткыштö кытшö Сандраöс). А öні Сандраöс асьсö сьылам.
Сандра (кöсйö петны кытшысъ. Нывъяс оз лэдзны). Ме бара-й ог.
Матьвей Грапö Сьылам, сьылам. Эн ерпенитчы, Сандра. Тадз жö сьылöны. Но кор юалöны: «Пасибö али абу?», зонъяс теш ради горöдöны: «Абу, абу!» нывъяс водзö сьылöны дзик нин мöдтор:
Сідзкö
- Гыр вор, шердын кодь,
Изки
карнан плеть,
Мöс
ciт вольпась,
Пон
сіт юрлöс,
Вöв
сіт шебрас.
Гуранысь
- гуранö,
Тёпканысь
- тёпканö,
Ис гидняö - руп!
Ставныс гажаа сералöны.
Сандра (дöзмыштö быттъö). Добра тай (нерö). Хи-хи-хи...
Митрöпан: Видзöд-тö кутшöм!
Матьвей Грапö (видзöдлö öшиньö). Со, ывлаыс кутшöм гажа! Локтö петаламöй, ворсыштам сэсся ывла вылас.
Микулай. Ветлам, Тист гöра боксö юждам. Додьяснас да дадьяснас ислалам!
Сергей. Шолльысям пöттöдз!
Катьö (пасьтасигмоз). Пажын бöрын бара на татчö чукöртчам (гогнитö юрнас Öнись дядълы), Позьö öд, Öнись дядь?
Öнись дядь. Позьö, позьö. Локтöй. Бура на гажöдчöй, рытыс öд ок на кузь.
Ныв-зон
зіля пасътасьöны да дуригмоз йöткасигтырйи петöны ывлаö.
Кылö гажа серам да нывъяслöн чилöстышталöмъяс.
Мöд юкöн
Гажöдчöмыс мунö сэні
жö Öнись дядъ ордын. Керкаын рöмыдкодъ. Пачводз дорсянъ пызан
дорö локтöÖнись дядъ. Киас пеша вор. Пуктö пеша ворсö
пызан вылö да бöр мунö пачводз дорö. Мыйкö
шарöдчö - корсьö. Пес моздорöн пырö Парась
тьöтка. Мыйкö, аслысмоз, шуалігтырйи нуö пессö пачводз
дорö да пуктö джоджö. Пöрччысъö.
Парась тьöтка (ки на ки воча вачкышталö да зыралыштö). Вот тайö и кöдздöдöма. Луннас небыдджык вöлі-а.
Öнись дядь (пачводз дорсянъ). Кöдздöдас, дерт, абу дивö. Рöштво гöгöрыд öд пыр кöдзыд овлö.
Парась тьöтка. Мый нö сэні корсьысян?
Öнись дядь (петö киас кос пес торйöн). Да öщепексö некысь эг аддзы. Быттьö вöлі на-а. Этатысь кöть, кос пусьыс юкавны лоö сартассö. Бура уна öд ковмас рытйысигад.
Парась тьöтка. Кыдзи нö абу öщöпек? Тонö да, гöбöч выв пельöсас, тюни панастö топöдöмыд да. Куим ли нёль öд эм жö на сэні кыдз пу öщöпекыс-а. (Кöритана). Кос пу пö юкала. Выжывмин али мый? Печласьны öд кутас кос коз пу сартасыд! Унджык нин сурсö тяпнитін али мый?!
Öнись дядь (балябöжсö
гыжъялігтырйи мунö гöбöч вывлань). Но, сё мокасьт тай. Збыль öд, ачым и топöді -
лички гын кöм панасöс.
Ветлö
да вайö кыдз пу öщöпек да чегöм коса торйысь
вöчыштöм пурт. Пуксъö джек вылö да босьтчö сартас
юкавны. Парась тьöтка босьтö öти сартас да
лöсьöдö - садитö пеша кöртö. Кылöны кок шыяс
да том йöзлöн гажа гöлöсъяс.
Öнись дядь (дугдö юкасъöмысъ). Со, чивильтысьясыд локтöны нин рытйысьнытö. Вай биась нин пöчук (юö-куралö яндöваысъ сур коляссö).
Парась тьöтка. Тыдалас на öти дук. Пырасны да вöлись. Вай саймовта яндöвасö. Тырмылас сэсся сурсö дучкыныд.
Воссьö öдзöс. Медводзын пырöны сералöгтырйи нывъяс.
Матьвей Грапö (гажаа). Бур рыт, Öнись дядь, бур рыт, Парась тьöтка, рытйысьны воим. Водзö чивильтны. Онö жö öд дöзмöй?
Парась тьöтка (öвтыштö кинас). Чöв-чöв, нылö!
Öнись дядь. Гажöдчöмсьыд огö дöзмöй.
Парась тьöтка. Том дырйиыд и гажöдчынысö, сё майбыр. Пöрччысьöй.
Нывъяс
пöрччысьöны да пуксялöны лабичъясö.
Парась тьöтка биасъö да пуксъö пеша дорö би видзны.
Катьö. Мыйкö
тай нö зонъясным вошины кытчöкö.
Матьвей Грапö (чеччö
лабичысъ да локтö Катъö дорö). Мый нö, гажыд быри нин али мый?
Босътö Катьööс киöдыс да кыскö
джодж шöрланьö.
Мöдыс оз сетчы Грапöлы, петитчö.
Матьвей Грапö. Лок, лок... вот нут-натыд (лэдзö Катьööс). Эн шогсьы, локтасны зонъясыд. Удитанныд на гильöдчынытö.
Мичаа
йöктыштігмоз босътö сьывны. Сэсся сувтöны тшöтш и
мукöд нывъяс. Катьööс босьтöны кытш шöрас, гажаа,
дзирнясигтырйи сьылöны:
НУТ-НАТ
Нут-нат,
нут-нат,
Ягодка
ли юм латка,
Есь
наречушка,
Чипан ладан под йöрдан.
На што девъятö,
На што гривъя то,
Гривъя то ли, девъято...
Выну
же выну,
Выйдэмэй
да-й Катьööй
Матвеевна,
вердöмöй.
Копыртчьтöны Катьöлы да гилъöдыштöны ciйöc. Катьö чилзігтырйи пышйö. Ставöн сералöны.
Воссъö öдзöс. Пырöны зонъяс. Пасътасьöмаöсъ повзъöдчысъ - кöшуй-тысъясö. Некодöс тöдны он вермы. öти гуга пася, юр вывтіыс шлапнитöма пасъсö, сосъясыс вывланьö (юр вылас кияссö пуктöма), юр местаас коколюка бура кузя тыдалö. Мöд «карнан киö» пасътасьöма. Чужöмъяснысö дöраторъясöн тупкалöмаöсь да мавталöмаöсь саöн ли шомöн. Карнан киаыслöн юр вылас пож.
Парась тьöтка (пернапасасъö). Сьват-сьват, тайö нин мыйся мутивейяс пырисны?
Öнись дядь (сералö). Вот тайö и пасьтасьöмась.
Öти повзъöдчысъ сувтö джодж шöрö да съылö (гöлöссö ёна вежöмöн):
Славися,
славися,
Господа
Ерусалима.
Поплы
- чукчи,
Дяклы
- дозмöр,
Пöнöмарлы
- воробей,
А свечечникъяслы -
Кос малямуш шöриöн.
Ставны сералöны. Повзъöдчысьяс повзьöдлöны нывъясöс. Чилзöм, серам.
Повзъöдчысъяс, кыдзи пырисны виччысьтöг, ciдзи жö и петісны керкасьыс. Нывъяс ыззисны дзикöдз. Морта-морт вежмöн тöдмалöны, коді-коді вöлі:
Сандра. Эсійö, коколюка юра петукыс, дерт, бара-й Микулай вöлі.
Тате. А карнан киаыс,
ме чайта да, Сергей вöлі.
Öти ныв. Öдвакö. Сергейыд öд кузь тушаа, а тайö дзоляджык быттьö вöлі.
Мöд ныв. Меным чайтсьö, Митрöпан тадзсö дурис.
Кылöны кок шыяс. Ставныс бергöдчисны öдзöслань.
Матьвей Грапö. Вот чили - булиясыд. Нöшта на косісны, тыдалö!
Воссьö öдзöс да пырöны пöчьяс - славитысьяс. Кыкöн. Найö сувтöны Ен öбразъясланъö, чöвталöны пернапасъяс да сьылöны:
Рождество
твоё,
Христе Боже наш...
Копыртчылöны
пызан дорын пукалысь Öнись дядълы да Парась тьöткалы:
Пирöг да шаньга.
Парась
тьöтка чеччылö да сетö налы пирöг да шаньга. Найö
надзöникöн петöны.
Матьвей Грапö (гажаа). Нывъяс, вайö гадайтчыштамöй!
Тате: Гадайтчынытö медбур куим туйвежын. Медея ёна инö сідзисö.
Матьвей Грапö. А ми тані гадайтчам. Медводз тэныд и гадайтам. Лок.
Тате (матыстчö). Но, локті. Кыдзи нö гадайтчам?
Матьвей Грапö. Пескöн
(пöрччö юрсъыс чышъянсö да кöрталö Тателысъ
синъяссö). Кутшöм пес сюрас ки улад - сэтшöм жö и
жöник лоö тэнад (вайö джодж шöрö пачводз дорысь
вит-ö-квайт пес да пукталö Тате водзö. Бергöдö
Татеöс куимысь ас гöгöрыс да йöткыштö
песъясланъö). Корсь жöникпутö.
Тате
кималасöн, джоджö тапикöдігмоз, корсъö пес. Сюрö зэв
увйöсь,
сирöд пес чурка. Лэптö сійöс джоджысъ. Ставныс серавлöны.
Тате (нетшыштö синъяс вывсъыс чышъянсö). Аминь - аминь, татшöм сарöгöсь чужöма жöник öд оз жö ло.
Öнись дядь (Парась тьöткалы шензъöмöн). Пöчук, пöчук, кытысь нö татшöм пессö пыртін? Эг тай нö быттьö вайлы татшöмсö ягсьыс.
Парась тьöтка. Вайлöмыд, тыдалö. Ачыс öд эз лок... Чипасысь тай пыртіа. Эз öд сюраыс тювгы.
Öнись дядь. Сё морö робота (гыжъялö юрсö). Вот, мокасьтыд.
Нывъяс нöшта на гадайтчöны. Сы кості пырöны зонъяс. Мыйкö сёрнитöны ас костаныс гажаа сералігтырйи.
Микулай. Чолöм - здорово. Мый нö, пескöн ворсанныд?
Сандра. Гадайтчам. Кодлöн кутшöм чужöма жöник лоö.
Микулай (бергöдчö Катьöлань). Но! Катьöлы нö кутшöм пес веськалі!?
Катьö. Медмичаыс.
Микулай. Сідзкö тай ме тайö!
Катьö. Эн сöр. Тэ кодьыд. Ме тöрыт нин нимсö тöдмалі. Гадайтчи да.
Митрöпан (шензьöмöн). Нимсö весиг тöдмалін? Кыдзи нö?
Катьö. А со
кыдзи. Гортын кабала торъяс вылö гижалі став зонъясыслысь нимъяссö,
гартлі тюрöкъясö да сюйи пась зептö. Сэсся сёрöникöн,
гусьöнмоз, мед некод эз аддзыв, Макар посланьö мöдöдчи.
Сэні öд куим туйвеж. Сэсся куим туйвежöдзыс вотöдз пыр шыблалі
кабалаторъяссö. Кор вои куим туйвежас - коли öти кабалатор. Топыда киö
чабырті, мед оз жö нин, мися, жöникöй вош, да котöрті гортö.
Матыстчи пеша дорö да лыдди... Öртем.
Ставныс серавлöны. Катьö ачыс медъёна, кынöмас кутчысъöмöн.
Микулай (юрсö дорлöдлö). Но, Öртем. Миян тані Öртемыс абу да.
Катьö. Но и мый. Кöнкö öд эм. Пöнара биöн, а корсям öта-мöдöс.
Матьвей Грапö. А ме ветлі жö куим туйвежад. Тöданныд, кыдзи гадайтчи?
Ставные (тшöтшмоз). Огö, огö. Вай висьтав.
Матьвей Грапö. Ыджыд мамö на велöдліс. Босьті чуманö пöим, пож да сартас тор. Войшöр кадöдз муш Кирö пос дорö. Сартаснас гижті ас гöгöр кытш, мед оз куття-войсаясыс гургыны-кыскыны кытчöкö юкмöсаныс, кисьті чуманысь пöимсö пожйö да пожналі кытш пытшкас, дзоляник местаö. Сэсся гортö муні. Асывнас ветлі да видзöдлі, кутшöм кок туй лоöма пöим вылас. Коді сувтлöма...
Митрöпан (лов шысö дзебöмöн). И мый?
Матьвей Грапö. Зэ-эв ыджыд тюни кок туй.
Сандра. Сідзкö тай зэв ён, ыджыд кока жöник сюрö веріс вылад (видзöдлö Öнъö вылö).
Öньö. Мый нö ме вылö видзöдан? Me эг сувтлы некутшöм пöим вылö (видзöдлö аслас кокъяс вылö да дзебö синъяссö).
Сандра. Me ветлі жö куим туйвежад. Вои, кытш жö гижті бедь торйöн. Пола жö öд куттяяссьыд. Бергöдчи коклябöр вылын да копыртчи. Киöн малышті ас гöгöрысь туй южсö да сюри рыжöй юрси.
Митрöпан. Но и мый. Мый сійö лоö?
Сандра. Сідзкö, менам верöсöй лоö виж либö веж юрсиа. Вот.
Митрöпан (малыштö ассьыс сьöд юрсисö да ышловзъö). Но-о!
Тате. А ме паньын ва кынті. Рытнас петкöді посводзö да. Асывнас петалі да пырті. Видзöдлі да - дзоляник, нёнь кодь, чулькъяс тырыс лоöма. Мамлы петкöдлі да весиг шай-паймуніс. Но, пö, дитя, дас кага тай ваян. Збыль кö сідзи лоö, Господьöй Енмöй.
Микулай (тапнитö Тателы бекъясас). Тэнад, бара-й Татюк, лоö.
Тате. Мун сэтысь, мисьтöм чужöм, тапйöдчан сэні, яндысьтöм бугыль.
Микулай. Он öд сыв. Ме кö эськö ныв вöлі, майбыр, эг дöзмыв тапйöдчöмсьыд.
Катьö. Тэ öд эськö, ныв кö вöлін, куимысь пиявлін жö нин да, Будимер.
Микулай. Будимер
пö (кöсйö кутыштлыны Катъööс). Лок топöдла
морöс бердö сё зöлöта латшкан гагйöс!
Катьö öвтыштö кинас, мынтöдчö да мунö Парась тъöтка дорö.
Катьö. Парась тьöтка, а кыдзи тi вöлі гадайтчанныд важöн, том дырйиыд?
Парась тьöтка. Да тадзи жö (вежö кусысъ сартассö). А нöшта со кыдзи вöлі нывъяс гадайтчывлам. Вой шöр гöгöр лэччам карта вылö, öткöн. Пырам ыж гидö. Сэсся кватитам - кутам öти пемöсöс. Видлам, - меж али баля. Меж кö - верöс сайö петан таво, а ыж кö, баля кö - пиалан. Вот.
Микулай. И коді жö тэныд, пöчö, веськаліс?
Парась тьöтка. Он öмöй аддзы (индöÖнись дядъ вылö). Со тай кутшöм меж лои. Гадайтчöм бöрас регыд и öтласим. Со öд кутшöма индіс.
Нывъяс мыйкö вашкöдчöны-килъкъялöны ас костаныс.
Микулай. Мый нö кильсканныд? Окота жö лои тадзи гадайтчыны?
Öньö. А-а! Кöсъянныд жö тöдмавыны, меж али баля мойвиас кутны.
Нывъяс. А мый нö огыс. Видлам бара-й.
Сергей. Вай сьылыштöй, нывъяс. Пыр öд сэсся гадайтчöм йылысь огö сёрнитöй. Очсöдлыны нин кутіс тіян гадайтчöмысь.
Тате да Сандра (öтлаынмоз). Сьылам, сьылам. «Здравствуй миловатö»!
Чеччöны да босьталöны сьыланкывсö, а мукöдыс чеччöны жö да кытшöн сувтöны. Йöктггмоз сьылöмöн пыр кытшовтöны-мунöны. Микулай сьыліг-йöктігас шутёвтлывлö гажаа:
Здравствуй
милова
Здравствуй, милова, (2-ысь)
Здравствуй, милая, корошая моя, (2-ысь)
Чорнöй бравöй, чорнöй бравой,
Чорнöй бравöя, пöрадошная. (2-ысь)
Юськок некому, юськок некому,
Юськок некому, гöлубушка моя. (2-ысь)
Один ялеч, один ялеч,
Один ялеч ты зачем девала. (2-ысь)
Три гöлубчик, три гöлубчик,
Три гöлубчик, трила скачет без меня. (2-ысь)
Без тебя, мой, без тебя, мой,
Без тебя, мой, друг пöследней, колостой. (2-ысь)
Головюшки, головьюшки,
Головьюшки потан улын во слезах. (2-ысь)
На ю парочки, на ю парочки,
На ю парочки настрой, настрой, настрой. (2-ысь)
Ок тi ючи, ок тi ючи,
Ок тi ючи, ючи горькая моя. (2-ысь)
Своё ючи, своё ючи,
Своё ючи проклинаючи. (2-ысь)
Тебя милой, тебя милой,
Тебя милой ожидаючи. (2-ысь)
Кричит молодеч, кричит молодеч,
Кричит молодеч: постой, постой, постой, (2-ысь)
Красной девица, красной девица,
Красной девица с тобой, с тобой, с тобой. (2-ысь)
Öнись дядь. Аттö-й молодечьяс жö! Кужанныд и гажöдчыны.
Микулай (ветлö пачводз дорö.Öти здук мысти локтö бöр. Киас ыджыд важ шапка). Коді кöсйö Африка видзöдлыны. (Локтö пукалысъяс дорö). Гашкö тэ, Сергей, видзöдлан? (Мигнитö сылы).
Сергей (гöгöрвоö Микулайлысъ мигнитöмсö). Ме öд аддзывлі нин, а Митрöпан вот эз на аддзыв Африкатö. Сылы петкöдлы.
Митрöпан. Кутшöм Африка, кöні?
Микулай (матыстчö Митрöпан дорö). А вот синъястö кунь, ме этійö шапканас тэнсьыд чужöмтö тупкыла, восьта да дзик пыр и аддзывлан Африкатö.
Митрöпан. Збыль?
Зонъяс. Збыль, збыль. Ми ставöн нин аддзывлім.
Митрöпан. А ме эг на и тöдлы. Но, сідзкö петкöдлы (куньö синъяссö да лöсъöдö чужöмсö).
Микулай (тупкылö шапканас Митрöпанлысь чужöмсö, вöрöдігмоз личкылö на чужöм бердас да бöр восьтö). Но, видзöд.
Митрöпан (лапйöдлö
синъяссö). Кöні?
Микулайыд
саöсьтöма шапка пытшкöссö да cідзи чужöмас Митрöпанлы шляпкылöма,
и мöдыслöн чужöмыс дзик са съöд лоöма.
Ставныс (теш сорöн). Негр, негр локтöма!
Митрöпан (оз на гöгöрво, дзöръялö öтарö-мöдарö). Кöні? Koді? Мый?! Кутшöм негр?
Парась тьöтка. Вывті жö нин детинасö мазитінныд.
Митрöпан (малыштö чужöмсö). Мазитісны? Кодöс? (Видзöдлö ки вылас). Менö али мый?!
Ставныс ваксьöны - сералöны.
Митрöпан. Екуня - ваняяс (чеччö да мунö мыссъыны).
Öнись дядь (Митрöпанлы). Но, пиö, Африкаö, шуан, волін. И меным петкöдлывлісны жö том дырйи. Эн лöгась, а то нöшта на и Мöскува петкöдласны.
Öньö. Мöскува?
Öнись дядь. Да. И збыль тыдалö. Оз, дерт, быдöнлы-а. Колö ёна кöсйыны аддзынысö. Мöскува йывсьыс мöвпалöмöн колö видзöдны зэв нин важ купайка сос пыр.
Öньоö Сöран кö буди-а?
Öнись дядь. Он кö эскы, дерт, оз тыдав.
Микулай. Петкöдлы, Öнись дядь, ме видзöдла (мигнитö сылы).
Öнись. Мыйла тэ?! Быдлаö тэ медводз чеччыштан. Ме водзджык видзöдла.
Микулай. Но, тэ
кö и тэ. Ме верма и мöдöн.
Öнись
дядь ветлö пач сайö давайö важиник купайка. Вевттьö
сійöн Öньööс.
Соссö
трубаöс моз вывланьö чургöдö. Тшöктö Öньілы
видзöдны пытшладор
сос помöдыс.
Öнись дядь. Сюсьджыка
видзöд, Öньö, сюсьджыка. Тыдалö оз нин (вежыньтыштö
соссö). А этадзи? А тадзи кö?
Öньö.
Оз на, сöмын югыд кытш эм.
Микулай
вайö кöшын ва да ыз - кисьтö вылысяньыс сос помас, пытшкас.
Öньö чушкöма моз ыткöбтö - чеччыштö.
Öньö. Ы-ы-ы... Мый нö тайö?
Öнись дядь. А
тайö, Öнюк, Мöскуваад зэрö.
Ставныс
сералöны. Öньö косöдö чужöмсö ки
чышкöдöн да сералö жö.
Сергей. Вот, тайö тай дивö! Вот тайö и Öнись дядь! Кутшöм бара-й том дырйиыд вöлін-а?
Парась тьöтка. Татшöм жö, мудилö.
Öнись дядь. Быдторсьыс жö ворслам вöлі. И кöза лысьтöмсьыд, и петуксьыд.
Катьö (шензъöмöн). Кöза лысьтöмысь?
Сандра. Петукысь? Кыдзи?
Öнись дядь. А вот кыдзи. Пудъясям да, коді «коза» лоö, кокъяссö кöрталам да быд ногыс и тімбылялам - тупльöдлам. Нывъясыд гачтöмöсь да зэв на и кажитчö вöлі миянлы, зонъяслы, тайö ворсöмыс.
А петуксьыд со кыдзи ворсöны - ыджыд дöрöм пытшкö сюясны - пасьтöдасны кодöскö, гöгöр кöрталасны да сэні и лоö овны, кытчöдз оз лэдзны. Семдытöдзыс ку-ка-ре-ку горзас да вöлись лэдзасны.
Микулай. А вайö и ми «кöза лысьтöмсьыд» ворсам, а?
Катьö. Зэв тай синъясыд югзисны. Лысьтысьысь петöма (чеччö да локтö джодж шöрö). Бурджык рабочöйясысь да колхозникъясысь ворсам.
Матьвей Грапö. Ворсам,
ворсам. Сэсся муналамöй, ворсам да.
Парась тьöткалöн, со, вомыс эз кут тупкыссьывны
очсалöмысла.
Ставöн ворсöны. Сэсся пасътасялöны, аттьöасьöны.
Матьвей Грапö. Аски нö сэсся лэдзланныд онö нин, бур пöчöй да шань пöльöй рытйысьнытö?
Öнись дядь да Парась тьöтка (тшöпшмоз). Лэдзлам,
лэдзлам. Локтöй.
Ныв-зон шмонитіг-варовитігмоз петöны керкаысь.
Парась тьöтка. Мун,
Öнисимушко, йигнасьышт, петав да. Дзикöдз ойбыр босьтіс (отьсалö).
Мед куття - войсаясыс оз пырны - крестав öдзöссö.
Öнись дядь петö. Парась тьöтка ноксьö - идрасъö.
Январ, 2002 во
|
|
© Нившерский
филиал им. Ф.Ф. Павленкова МУ «Корткеросская ЦБС» 2011 Республика Коми, Корткеросский район, с.
Нившера, м. Дiвыв, д.728 E-mail:
lebedevlib@mail.ru ( 8-(82136) -9 – 83 – 93, 8-(82136) 9 –
98 -16 |
