Дöваяс
Коньöр аньяс-бабаяс.
Война кадся дöваяс.
Кутшöм грекысь сьöкыд крестыс
Öшйис тiян вылö сэки?
Война вöлi кузь да лек.
И кор верöс бöр эз лок,
Таттян, Саша, Марья, Клавдии –
Выланыд сьöд чышъян плавгид.
Шог, дерт, вöлi кыдз он бöрд.
Сьöлöмыд öд абу кöрт.
Ачыд том на, дiнад челядь.
Муса гöлöс кылö пеляд:
«Дыр ог ветлы, локта бöр,
Виччысь менö, сьöлöмшöр,
Кутам овны важсьыс бура,
Керка пытшкöс шудöн тырас».
Эз тай нинöм сiдзи ло:
«Похоронка» воис со.
Кодлы водзын, кодлы бöрын,
Пуксис пемыд вой лун шöрын.
Висис венны позьтöм дой.
Узьтöм колис уна вой.
Лиза, Öдя, Агни, Анна –
Ставныд прöстöй коми аньяс.
Мыйта терпенньö да вын
Ковмис сьöкыд олöмын.
Эн тай сетчöй тi, зiль войтыр.
Муöдзис тiiянлы копыр.
Некод оласног эз веж,
Юан туй вылö эз кеж.
Быдтiд челядьтö тi лючки,
Мырсид-уджалiнныд сутки.
Верöс сюрис, гашкö - й, бур.
Сöмын батьыд мöд оз сюр.
Сiдзи-й коллялiнныд кадсö.
Öткöн вуджинныд став адсö.
Кодлöн гу вылас Нин крест,
Кодкö пыр на кыскö крест.
|
Уна-ö мортыдлы колö?
Уна-ö мортыдлы колö?
Вöлi мед овнытö жыр.
Нöшта мед частöджык волö,
Кодöс тэ виччысян пыр.
Кутшöм пö олöмыс, сiдзи и сьывсьö:
Шогыс да радлуныс орччöнöсь пыр,
Лекыс да мисьтöмыс ылын мед кывсьö,
Муслун мед некор оз быр.
Уна-ö мортыдлы колö?
Вöр-ва да дзоньвидзалун,
Вöрас мед зверь-пöтка олö,
Лэбач мед пальöдö ун.
Уна-ö мортыдлы колö?
Сеянöн тыр пызан выв.
Колана уджыд мед кольö,
Сернитны ас чужан кыв.
Уна-ö мортыдлы колö?
Зепъясад сьöмтор мед эм,
Öдйöджык бурмис мед олöм,
Шудаа коллявны нэм.
|
