Ме, Нестерова (Старцева) Алёна Николаевна (18.11.1985), чужи да быдми Ыджыдвидз сиктын. Школа помалöм бöрти 2002 воö пыри велöдчыны Сыктывкарса канму университетö фин-угор факультет вылö. Университетын велöдчигöн петi верöс сайö. Андрей верöскöд быдтам кык кагукöс, Максимöс да Аннушöс. Онi ола Сыктывкарын. Уджавны пондi 2009 восянь сыктывкарса школаын. Велöдi карса челядьöс коми кывйö. Велöдысь уджыд аминь сьöкыд вöлöма. 2010 восянь кутi уджавны методистöн С.Я. Маршак нима челядьлöн Коми республикаса Национальнöй библиотекаын.
  Кывбуръяс заводитi гижны школаын велöдчигöн на. Куимысь велöдчылi Том гижысьяслöн гожся университетын. Во гöгöр ме ветлöдла  «Арт» журнал бердса Литературнöй семинарö, кодöн веськöдлö енбиа поэтесса Елена Афанасьева. Менам кывбуръяс петавлiсны районса да республикаса газет-журналъясын, альманахъясын. Кывбуръясын воссьöны челядьдырся кад, бать-мам борд улын лöня олöм, муслун, шуд да шог йылысь мöвпалöм, кывбур гижöм да уна мукöд визьяс.

Шуда здукö чужан керка стенын
Öшкамöшка югнитлывлö меным.
Куньтырасьö уна рöма синнас,
Сьöлöм шöрöдз мелiлуннас инмö.
                    
Серпасалö кöмтöм кока олöм:
Батьöн пестöм бипур дiнö вола,
Мам ки кöра кöвдумъясысь пöтла,
Купальнича горйын вомидз вöтла.

Тяпка пöчлöн шомакоръя руньöн,
Сера гагйöс сьылöда бур туйö,
Сюрукъяскöд ыркöдча лöнь ваын,
Чурскöдчышта дзоридз кöра маöн.

Юмов кадöй кольöма нин бокö.
Сöмын унаысь на кöмтöм кокöн
Тупыльтчыла карсянь сиктса гортö
Вочаасьны уна рöма ёрткöд.

* * * *

Тэ катшасина видзтi собавлан
Да куткырвидзан мамук моздорын.
Тэ чужанiнысь ылын шогалан
Да востымасян муса поз дорын.

Тэ коркö йöлöгаöн шыалан
Да весиг овлан гора нимаöн.
Тэ кодкö серам вылö ылавлан
Да весиг бöрдан юмов синваöн.

Тэ йöзаинö петны сырмылан
Да öтка мортлы воссян тыр-бура.
Тэ сьöлöм торпыригысь быдмывлан
Да тöвруöн тэ лэбзян,
                                           кывбурöй!

* * * *

Уна во нин öввö сьыла,
Мöд гоз чуньтöм кепысь кыа.
Сöмын век на кокöй нулö
Мамлöн шоныд морöс улö.

* * * *

Енэж польдiс, польдiс, польдiс,
Чардби лöсыштöмысь потiс.
Кымöр гöрöдъясöд письтiс –
Зэрсö кисьтiс, кисьтiс, кисьтiс.

Тöвсö пöльтiс, кытшö гартiс,
Жыннянъясö вартiс, вартiс.
Шлявгис, лявзiз, льöмзiс, сьöвзис,
Польсйис, тёльсйис… сэсся öвсис.

Шондi югöръясысь бурдiс…

Вöр-ва ышловзис да нюмдiс.

* * * *

Виччыся зэрсö,
Мед пыдзыртны шогöс да дойöс.
Сьöлöмын
Нюкыртчöм дзоридзлысь ловзьöдны сер.
Зэр ванас, вежанас,
Пызйыны дубалöм лолöс.

Мыськыны сьöдасьöм мöвпъясöс
Виччыся зэр.