Самöвар

Выль самöвар

Трубасыс лэдзö пар,

Зэв яра варгö-пуö

Да пызан вылö кыпöдчöмöн шуö:

«Ак, кутшöм мича менам чужöмбан!

Ме тан

Став мукöдпöлöс дозмукъясысь дона!

Öд быдöн вермас гöгöрвоны,

Мый кöн ме югъяла да пуа-варга тадз,

Сэн позяс шыбитны став гырнич, пöрт да

рач!»

Тшап самöварлы вочавидзис

Сьöд чугун пöрт:

«Ме шензя, мыйла ошйысян тэ сiдзи.

Тэ мича, дерт,

Но пузьöдны куш васö сöмын верман,

А ковмылас кö пуны шыд да рок,

Тэ дзик пыр йöрман

Да шогмытöмöн лоан гöгöрбок.

Быд дозмуклöн эм аслас удж да мог!»

___________

Оз уна бурыс сэтысь чукты,

Кор пуксяс веськöдлысьö асьсö ошкысь морт:

Пыр чатöртöма нырсö татшöм ëрт,

А мукöдъяслысь уджсö пыдди оз и пукты.

Куш больгöм вылö сöмын сiйö яр,

Кыдз пузьöм самöвар.

..К содержанию К началу раздела

---