Чань да Петыр Вань

Бур олысь вöлi Петыр Вань.

Роч шобдi öтчыд сiйö кöдзис

Да йöрас ассьыс Чаньсö лэдзис,

Мед рака кокалöмысь видзас сiйö нянь.

Сюсь стöрöж лои тайö Чань:

Оз лэдзлы ракаяссö йöрö,

Зэв зiля сэнi вöрö,

Кысь аддзас ракаöс, дзикпыр

Йöр вомöн уськöдчас, оз видзöд сэсся дыр.

Дзонь тöлысь сэнi сiйö олiс,

Роч шобдi видзöмысла войяссö эз узь.

Кöть уна рака сэтчö волiс,

Но кокыштны эз вермыв öти тусь.

Дерт, Чаньлöн юралысь зэв бура гöгöрвоис,

Кыдз колö видзны шобдi нянь.

Но бöръя помас со мый сэсся лоис:

Став мусö талялöма Чань!

Кор Петыр Ваньö локтiс видзан йöрö,

Сэн шобдi шеп эз аддзы öти тор.

Пыр сiйö киас босьтiс зор

Да шуис: «Кодi уджсö тадзи керö,

Ме сыкöд лöсьыд сëрнияс ог пан

Да зорнас кольскöдышта тан!»

Роч шобдi кöдзанiнын Чаньсö сiйö нöйтö

Кодсюрö горзö: «Велöд, велöд йöйтö!

Мед мöмöтöн оз чуж,

Мед видзны му оз кутчысь, оз кö куж!»

_____________

Код танi мöмöт позьö гöгöрвоны.

Тадз уджалiгад бур оз вермы лоны.

Кор Петыр Ваньлöн мусö видзö Чань,

Сэк Петыр Вань

Оз сëйлы шобдi нянь!

..К содержанию К началу раздела

---