Выль олöм – выль сьылöм

Шондi кайö, йöзлы вайö

Югыд лун да югыд гаж.

Овны выльногöн ми кутам.

Öнi кадыс абу важ.

Миян сиктын лунысь-лунö

Быдмö, лэптысьö колхоз.

Пемыдiнсянь югыдiнö

Сiйö вöчö паськыд пос.

Абу дивö, коллективö

Ме кö пыри, сиктса морт.

Сэнi лöсьыда ме ола,

Кыдзи тшöктö Сталин ëрт.

Кутшöм праздник талун воис?

Гöгöр юргö сьыланкыв.

Тайö страдна вылö петö

Миян сиктса коллектив.

Эм колхозын уна вöвъяс,

Ставыс бурöсь, ëнöсь зэв,

Сöмын «Сталинец» выль трактор –

Медся вына сэнi вöв.

Гöрбуш-косаöн кор ытшки,

Ружтi видз вылас ме пыр.

Öнi машинаöн ытшка –

Локта гортö сьылiгтыр.

Öткаолысь гöрö-кöдзö,

Равзö, горзö: сöт да сöт!

Долыд, кыпыд öтув уджсö

Сiйö, коньöр, оз на тöд.

Пöрысь пöчö енсянь корö

Аслыс кулöм бöрас рай.

Ноко ловъя дырйи асьным

Райсö вöчламöй ми вай!

Муса батьö, муса мамö,

Ог ме пемыд мортöн ов.

Муна велöдчыны карö,

Сэтчö лэбзьö менам лов.

Матрен тьöтка важöн шулiс:

Мем пö грамöта оз ков.

Öнi шыпасъяс нин тöдö,

Вермö гижны ассьыс ов.

Шоныд гожöм бöрын арын

Усьö муяс вылö пуж.

Менам сьöлöм шогöн тырö,

Мыйла лыддьысьны ог куж.

Коркö вичкоö ме ветлi,

Сэнi босьтiс менö ун.

Öнi клубö, комсомолö

Ветла-конрала быдлун.

Энö корö менö, нывъяс,

Ог ме ворсанiнö мун:

Öд нывбабаяслöн талун

Клубö чукöртчылан лун.

Талун гижсим муса нывкöд.

Шуим: олöм лоас бур!

Сэсся спектак вылö мунiм.

Оз ков вина, оз ков сур.

Парта вина кöсйи юны,

Сэсся шуи аслым: ог!

Книга та вылö ме ньöба,

Тайö медся ыджыд мог.

Корсьлöй, пиян, кöнi миян

Лэчыд пила, лэчыд чер?

Колö öдйö мунны вöрö?

Сöвет власьтлы лэдзны кер.

Берег дортi утка кывтö,

Ассьыс чатöртöма юр.

Эжва ю кузя гöрд флагöн

Шуньгö увлань миян пур.

..К содержанию К началу раздела

---