Мича ныв

(«Мича ныв» опереткаысь юкöн)

Сьылысьяс

Гажтöм лои мича нывлы,

Синва кутiс петны:

Верöссайö пöрысь сайö

Бать-мам кöсйö сетны.

Аддзö, тöдö мича нылыс:

Олöм сылöн дзугсьö.

Бöрдö сiйö, синва кисьтö,

Пызан сайö пуксьö.

Долыд олöм, гажа олöм

Мича нывлöн бырö…

Öдзöс ньöжйöникöн воссьö,

Бать-мам сылöн пырö.

Бать-мам

Нинöм тэныд, муса нылöй,

Бöрдны лунысь лунö.

Кöть и пиньтöм жöник лоас,

Эмбур сылöн уна.

Мича ныв

Ог мун, ог мун пöрысь сайö.

Пöрысь кöдзыд вира.

Пöрысь сайö петöм дорысь

Джуджыд йирö пыра.

Бать-мам

Муса нылöй, пиньтöм вомысь

Нинöм тэныд повны.

Сэтшöм озыр пöрысь морткöд

Зэв на позьö овны.

Мича ныв

Кодлы позьö, мед и олас, -

Оз ков меным сiйö.

Пöрысь сайö сетöм дорысь

Черöн менö виöй.

Бать-мам

Озырлуныд, муса нылöй,

Быттьö югыд шондi.

Тшöтш ми татшöм озыр зятькöд

Нимкодясьны пондам.

Мича ныв

Мый кöть тiянлы и нимкодь,

Абу нимкодь меным.

Озырлуныс кöть и лоас,

Шудлуныс нö кöнi?

Сьылысьяс

Шог оз бырлы мича нывлöн,

Бöрдiгтырйи олö,

Оз и сëйлы, оз и юлы,

Пиньтöм вомысь полö.

Мича нывлöн донаторйыс

Мунiс ылö-ылö,

Сизим тöлысь эз нин аддзыв

Ассьыс муса нылöс.

Мича ныв

Мыйла, мыйла, муса зонмöй,

Эновтiн тэ менö?

Гашкö, локтан, бöръя лунöдз

Виччыся ме тэнö.

Сьылысьяс

Муса зонсянь юöр абу,

Письмöыс оз волы…

Мича нывлы пöрысь морткöд

Чунькытшасьны колö.

Мича ныв

Ог мун, ог мун пöрысь сайö, -

Пöрысь паськыд тоша.

Паськыд тош пиас ме, коньöр,

Яг пиын моз воша…

..К содержанию К началу раздела

---