«Зыбкадорса сьыланкыв»

Öввö, öввö, ичöт пиöй,

Сьöлöмшöрöй, узь!

Пемыд войысь нинöм повны,

Войыс абу кузь.

Асъя кыа бöрын лоас

Бара гажа лун.

Зыбка дорысь тэнад мамыд

Некытчö оз мун.

Ог ме дона пиöс эновт,

Некодлы ог сет.

Менам зарни, мича кага

Бура узяс мед!

Эзысь лэптысьöма тöлысь,

Быттьö еджыд юсь…

Öввö, öввö, муса пиöй,

Сьöлöмшöрöй, узь!

Понда висьтавны ме тэныд

Уна-унатор:

Мыйла, кыдзи тэнад батьыд

Томöн лоис дзор;

Мыйла уджалiгас сiйö

Шойччöгсö оз тöд;

Кыдзи усьтöдз сiйö тiльсис,

Сöмын эз вöв пöт.

Сэки уджалысьыс вöлi

Медся ичöт морт.

Сэки уджалысьыс вöлi

Кöрталöма борд.

Öнi олöм миян вежсис,

Батьыд лои сюсь…

Öввö, öввö, дона пиöй,

Сьöлöмшöрöй, узь!

Коркö быдман, пондан тöдны

Öнъя оласног.

Öтув сиктсаяскöд овны

Лоас тэнад мог.

Тöлысь кисьтö эзысь югöр,

Пышйö пемыд вой.

Öнi тэнö, ичöт кага,

Бубуля оз сëй.

Нинöм повны, кöть и буксö

Войшöр-войын сюзь.

Öввö, öввö, зарни пиöй,

Сьöлöмшöрöй, узь!

..К содержанию К началу раздела

---