Коми збойлун

Гажаджык, коми йöз, олöй.

Шогсьыны, бöрдны оз ков.

Кулöмысь, смертьысь эн полöй:

Некор оз кув миян лов.

Лов миян кувны оз вермы.

Ловлы оз волывлы пом.

Ловъя морт некöн оз йöрмы.

Мортлы он пукты кöртвом!

Уна ми аддзылiм шогъяс,

Жалитысь некод эз вöв.

Вунöдам сiйöс, бур вокъяс,

Шогсö мед новлöдлас тöв!

Некор ми шойччöг эг тöдлöй,

Корсим ми век кынöмпöт…

Збойджыка, вокъясöй, ветлöй,

Миянöс аддзасны мед!

Кутам ми смелджыка овны.

Миянлы шог – абу шог.

Дугдам ми лëк йöзысь повны –

Лëк вылö асьным ми лëк!

Гажаджык, вокъясöй, олöй,

Кытчöдз вын-эбöс эз быр.

Миянлы гажыс и колö,

Аддзам ми гаж пырысь-пыр!

..К содержанию К началу раздела