Коми му кузя ме муна

Коми му кузя ме муна.

Гöгöр сулалö сьöд вöр.

Вöрыс вывтi-вывтi уна,

Сыысь унаыс оз тöр.

Аддза: сэнi шыльыд пожöм

Вылö лэптö ассьыс юр.

Сылы öткодь тöв кöть гожöм.

Сэтшöм пуыс тайö бур.

Сэнi быттьö пöрысь пöчö

Дзормöм кыпöдчöма коз.

Сiйö увъяс костын вöчö

Вöрса пöтка шоныд поз.

Сэнi вашкöдчöны гора

Пипу чойкöд еджыд кыдз,

Мыйкö сëрнитöны нора,

Корнас шенасьöны сiдз.

Сэнi суспу гöгрöс бока,

Сэнi пелысь, сэнi льöм.

Танi бадьяс вöсни бока

Вадор пöлöн уна эм.

Вöрыс помтöм. Туйыс кöнi?

Зонмö, яг пиад эн вош.

Аддза танi, аддза сэнi

Ыджыд тапикасьö ош.

Ветлö кöин, пиньсö йирö,

Корсьö аслыс кынöмпöт.

Наян ручыс гуö пырö,

Бурöн некодлы оз шед.

Кöчыс дзебсьö лöпъяс сайö,

Видзö ассьыс дона юр.

Öдйö-öдйö пуö кайö

Паськыд бöжа ичöт ур.

Дозмöр пувсö зiля сëйö,

Гöгöр жуö сьöла, тар.

Тури кокнас нюрсö лойö:

Абу муса сылы ар.

Аддза: пищальöн со мунö

Сьöла кыйны коми морт,

Гортса олöм сылöн вунö,

Ылö кольöма нин горт.

Туйтöг öтнас ветлö сiйö,

Вöрын нинöмысь оз пов.

Уна вöрса пöтка кыйö,

Уна зверлысь босьтö лов…

Муна водзö, муна ылö,

Оз и помась пемыд вöр.

Кöнкö гора сëрни кылö,

Бриньгö пила, клëнгö чер.

Аддза: сортовка кер лэдзö

Том и пöрысь коми йöз,

Мича шпалсö зiля вöчö,

Тэчö юяс дорö пес.

Вöла войтыр сэнi жуö,

Трактор муркöдчö лунтыр:

Кыксë керйöн öтпыр нуö

Гора шыöн ветлiгтыр.

Оз кыв сэнi видчöм, мургöм,

Лëкысь горöдлöм оз кыв,

Сöмын уджалысьлöн юргö

Кыпыд, гажа сьыланкыв…

Паськыд туй вылö ме пета.

Аддза: вежсис туйлöн сер,

Кöть и важ моз шувгö сэтöн

Кыкнан бокас пемыд вöр!

Бöр и водз пыр ветлö сэнi

Уна сë автомобиль,

Вöлöн мунысьясöс венö,

Быд лун локтö вылысь-выль.

Муна водзö… Тулыс воö.

Лымйыс сылö, киссьö зэр.

Кöдзыд йисö шондi сëйö.

Ойдö уналатi вöр.

Ваын сулалöны пуяс.

Ваыс зеркала кодь лöнь.

Эжва, Сыктыв, коми юяс,

Быттьö паськыд эзысь вöнь.

Аддза: трактор мусö гöрö.

Коми войтыр кöдзö нянь.

Тувсов уджсö быдöн керö.

Жургöм тракторлöн оз ланьт.

Тайö трактор – абу дивö,

Абу дивö – паськыд йöр:

Йöзыс олö коллективöн,

Лëк пу гöрйöн оз нин гöр…

Бара водзö, водзö муна.

Гöгöр сулалö сьöд вöр.

Вöрыс вывтi-вывтi уна,

Сыысь унаыс оз тöр.

..К содержанию К началу раздела

---