Тэ петавлiн рочысь,
Тэ комиöн сьылiн,
И пармаса войтырлы
Волiн тэ ас.
Öд найöлысь вöлясö
Томсяньыд кылiн –
И колин
Быд радейтысь лов пытшкö пас.
Сэк збойлуныс колö,
Кор олöмыс личкö,
Кор югыдлань петан туй
Корсьысьö лов.
И зэв колö ас кадö
Ыззьöдысь, сiдзкö, -
Йöз юр вывтi збоялöм
Сöмын оз ков.
Пöсь сьыланнад дыр
Коми му кузя мунiн
Да йöзсö и сьöд вöрсö
Нимöдiн сiдз.
И выльмöдöм шыяса
Югъялiс луныс,
Кöть олöмлöн шыбöльысь
Асьтö эн видз.
Тэд олöмыс Эжва моз
Гыалiс воча,
А Эжваным вöлi
И Тэд эзысь вöнь.
Тэд колипкай нимкодьсö
Вайлiс эз шоча
И сэки, кор гыа,
И сэки, кор лöнь.
Быд керöслы медвойдöр
Инмö и зэрыс,
И шерыс, и тöлыс,
И быд пöлöс гож.
Тэ сьылансьыд лыбöдiн
Ас сикас керöс,
И войтырлöн син улысь
Сiйö оз вош.
Öд тыдалö сэтысянь
Гажыс и дойыс –
Поэтлöн бур сьöлöмысь
Нюжöдлöм пос.
Збой чикышöн
Тювгöны-лэбöны вояс,
Дзик ни öти на лыдысь
Бöрсö оз кос.
И со – сëöд арыд нин
Выль лымсö вайö,
Мöд тулысöдз гу вывтö
Шебравны мед,
А кельдöдöм шондiыс
Керöсöд кайö,
Кöн важ моз на шувгöны
Пожöмъяс Тэд.
И ме коркö век кежлö
Ас муö вода,
Но кöсъя, мед комилöн
Некор оз вун
Да тэ бöрысь шуысьыс
Му вылын содö:
«Мед дзирдалас шондi
Да югъялö лун!»
Попов, В. Михаил Николаевич
Лебедевлы: [стихотворение посвящено
М.Н.Лебедеву] /В.Попов// Войвыв кодзув. – 1978. - № 1.